St. Anthony miabante na sa talamban inter-sitio basketball under 25d semifinals
CEBU, Philippines — Gipaluhod sa St. Anthony ang Nasipit Proper, 83-74 aron moabante sa semifinals sa bracket D sa under-25 division sa Talamban Inter-sitio Basketball Tournament 2018 niadtong Martes didto sa Talamban Sports Complex.
Si Jake Stephen Paray mikulit og 14 puntos, samtang si Ericson Ouano mikadlit og 10 puntos sa St. Anthony, kansang duwa wala gyud molubad gikan sa pagsugod hangtod sa katapusang pitik sa orasan.
Duha sab ka players sa Nasipit Proper ang mipugnit og double figures sa pagpangulo ni Rizal Talledo nga mitikdol og 25 puntos, apan nakawang lang ang iyang paningkamot kay nasugamak ang iyang team. Ikaduhang topscorer mao si Ian Pelayo nga mitimang og 11 puntos.
Solidong depensa uban ang hait nga opensa maoy gihimong hinagiban sa St. Anthony paglubong og katunga sa Nasipit Proper, 38-19 sa nahibiling 5:15 sa second period.
Miburot pa kini ngadto sa 51-28 nga maoy labing dakong labaw nga natala sa St. Anthony. Apan ang maong labaw mihiyos dihang mi-rally ang Nasipit Proper ubos sa pagpangulo ni Talledo. Wala hinuon maalarma ang St. Anthony kay kontrolado man nila ang duwa.
Sa laing aksiyon, nagkaduol ang kahigayonan sa Kalubihan nga moabante sab sa semifinals ubos sa bracket E dihang midaog sila batok sa Banica, 80-76.
Sila si Ray Montera ug Bobet Andrew mipupo'g 12 puntos matag usa alang sa Kalubihan, samtang sila si Ralph Rojo ug Christopher Edisan nagtampohay og 10 puntos sa Kalubihan.
Nangulo sa Banica mao si Raymart Maputi nga miburak og 16 puntos. Sila si Jonnel Migallen, Johnrey Migallen, Ivan Archival ug Lambayan mihimo sab og double-digits performance.
Ang tinuig nga liga nga giorganisar ni Talamban Barangay Council ubos sa liderato sa aktibong kapitan Dario B. Arcilla, gipadagan ni sports coordinator Junjun Ferolino sa abag ni Lee Bonusan ug sa Barangay Talamban Task Force On Youth Development (TFOYD).
Dako kaayo og labaw ang Kalubihan sa third period, 62-45 sa third period, apan nahimong kulbahinam ang duwa dihang milabaw ang Banica, 76-75 sa nahibiling 50.4 segundos sa duwa sa tres ni Adrian Ycot. Apan si Ralph Rojo mihimo og 3-point play aron ilogon og balik ang labaw, 78-76.
PUNTOS MATAG USA
Unang duwa:
KALUBIHAN (80) – Montera 12, Andrew 12, Rojo 10, Edisan 10, Pono 7, Codizar 6, Villamor 6, Leyson 6, Ponce 3, Chan-Chan 2, Bontuyan 2, Arceo 2, Surban 2.
BANICA (76) – Maputi 16, Jon. Migallen 12, Joh. Migallen 11, Archival 10, Lambayan 10, Limotan 6, Ycot 5, Cantere 4, Velarde 2.
Ikaduhang duwa:
ST. ANTHONY (83) – Ja. Paray 14, Ouano 10, Mayol 9, Jon. Paray 9, Malazarte 8, Jas. Paray 7, JP Paray 7, Herbito 6, Antiquando 6, Bontuyan 6, Oporto 2, Lodovice 2.
NASIPIT PROPER (74) – Talledo 25, Pelayo 11, Caputol 8, Yaun 8, Ouano 6, J. Fontanar 6, Borlasa 4, Vercide 2, E. Fontanar 2. Felisan 2.
- Latest
