Rockets nagpanikad molabaw sa serye

CEBU, Philippines – Ang Houston Rockets dunay kahigayonan nga motilaw sa labing una  nilang labaw sa Western Conference finals kun ugaling mausban nila og pilde ang Golden State Warriors karong adlawa.

Aron ila kini nga makab-ot, nangina-hanglan na sab sila og eksplosibong salida gikan sa ilang superstars nga sila si James Harden ug Chris Paul, kansang pangmangtas sa Game-4 nahimong yawi sa Houston aron makakawat og usa ka daog didto sa Golden State ug ingon man tablahon ang serye sa baraha nga 2-2.

Sayod si Rockets coach Mike D'Antoni nga duna pa sila'y daghan nga angayang paga-buhaton, apan sa susamang higayon napuno siya sa pagsalig ilabi na kay napamatud-an nila ang ilang kapasidad nga mapiog ang gikaintapang puwersa sa Warriors.

Sila si Harden ug Paul nagkumboya'g 57 puntos sa 95-92 nga kadaogan sa Rockets niadtong Martes nga nakahatag og balik kanila sa homecourt advantage.

Aron mosamot og kabagsik ang Rockets, gikinahanglan nilang Harden ug Paul ang suporta nilang PJ Tucker, Clint Capela ug Eric Gordon ug uban pa aron ilang maangkon ang krusyal nga daog.

Samtang sa habig sa Warriors, wa'y laing sud sa   ilang  huna-huna mao    ang    pagbawos  sa  Rockets  bisan tuod og  lisud  nga tahas  ang ilang   sagubangon   kay manulong na sab sa teritoryo  sa  ilang   kontra.

Si Stephen Curry miangkon nga iyang gihinuklogan og maayo nganong 12 puntos ra ang ilang nahimo sa katapusang kuwarter nga nakatampo sa ilang kapildihan sa Game-4. Wala hinuon makaduwa ang beterano nilang starter nga si Andre Iguodala kay dunay bun-og sa wala niyang paa.

Lagmit malahi na ang estorya kun makabalik ba si Iguodala sa kampo sa Warriors  nga magsandig sab nilang Kevin Durant, Klay Thompson ug Draymond Green.