Celtics nanuktok na sa NBA finals

CEBU, Philippines – Nalagsik ang Boston Celtics sa ilang pagbalik didto sa  ilang korte ug gilubong ang Cleveland Cavaliers, 96-83 aron pagtikang ngadto sa usa na lang ka daog aron hingpit na nga mosulod sa NBA Finals kagahapon didto sa TD Garden sa Boston, Massachusetts.

Si star rookie Jayson Tatum miburak og 24 puntos aron pangulohan ang lima ka Bostons players nga mikadlit og double figures sa dihang ang Celtics miposte og 3-2 nga bentaha sa 'best-of-seven' Eastern Conference finals.

Si four-time NBA Most Valuable Player LeBron James maoy nangu sa Cleveland uban ang 26 puntos, 10 ka rebounds ug lima ka assists, apan daw sa gibatyag na niini ang kabug-aton sa iyang pagpas-an sa Cavs sa playoffs. Nakahimo siya og unom sa 15 ka turnovers sa Cavs, upat niini sa second half diin sila gilabhan sa Celtics.

Apan gisalikway dayon ni James ang mga pangagpas nga gikapoy na siya sa iyang pagdala sa Cavs ning puntoha.

Si Kevin Love mao lang ang miabag ni James sa nagkagidlay nilang Game-5 bitbit ang 14 puntos. Dili pa hinuon ulahi ang tanan alang sa Cavs ilabi na kay sila ang mo-host sa Game-6 karong Sabado diin sila naglaraw nga iduso ang serye sa kinatumyan niining rota nga Game-7.

Sa dihang naglingkod si James sa ilang bangko, ang Celtics miinat sa ilang 16 puntos nga labaw ngadto sa 21. Ang Cavs milusad og 9-0 run aron pagsikit niini ngadto sa 12 puntos, apan nasipyat sa sunod nilang upat ka itsa hinungdan sa ilang pagkasukarap.

Sa maong kadaogan, nagpabiling limpiyo ang rekord sa Celtics sud sa 10 ka duwa sa playoffs didto sa ilang tugkaran.

Sa nahibilin nga 10:47 sa ikaduhang kuwarter, dunay tensiyon nga miulbo tali nilang Marcus Morris sa Boston ug Larry Nance sa Cleveland. Kay nag-apil-apil si Terry Rozier sa gubot, apil siya sa gisagpa og 'technical foul'.

Si Cavs coach Tyronn Lue miangkon nga dili gyud maayo ang ilang labok hinungdan sa ilang pagkapilde. 

Labing maayo nilang buhaton karon mao ang mopauli sa ilang nataran, dag-on ang Game-6 ug dayon manulong og balik sa Boston.