D' Lurics enterprises midaog na gyud sa Triple-A

CEBU, Philippines — Sa ikaupat nga pagsuway, ang D' Lurics Enterprises nakatilaw na gyud og daog dihang ilang gitiwasan og pilde ang Monterroyo, 67-55 sa Triple-A President's Cup 2018 basketball tournament niadtong Domingo didto sa Kimwa gym, Mandaue City.

Labaw ang Monterroyo sa nag-unang duha ka kuwarter ug gitapos nila ang halftime sa iskor nga 32-25, apan human mailog sa D' Lurics ang momentum sa sayong bahin sa third period, 37-32 wala na kini makarekober pa.

Ang Monterroyo nga aduna la'y lima ka players niduwa, miaksiyon og kaluya human mabiyai og 10 puntos, 41-51 sa hinapos nga bahin sa third  quarter, apan kalit   nalagsik dihang nakasikit, 49-51 sa tunga-tungang bahin sa fourth quarter. Didto ra hinuon kutob ang maayo nilang performance kay giinat og balik sa D' Lurics ang ilang labaw.

Si Robert Cuerbo maoy topscorer sa D' Lurics Enterprises nga mipugnit og 17 puntos, gisundan sa team manager ug ballclub vice president Dodong Lurica nga mikulit og 15 puntos. Si Geryl Bukiron mitampo og 10 puntos sa D' Lurics nga aduna na'y 1-3 record.

Ang Monterroyo nga wala pa'y daog sa upat ka duwa gipangulohan ni Richard Lawas nga mipabuhagay og 21 puntos, samtang sila si Jojo Bodo ug Khieth Secosana mitampo'g 14 ug 12 puntos sa team nilang Dr. Raul Monterroyo ug Jamz Manatad.

Sa laing aksiyon, ang Explorer miagi pa og double overtime una maangkon ang tungason nga kadaogan batok  sa AC Troopers,73-70.

Si Ramil Estremos mibagnos og 21 puntos aron pangulohan ang Explorer ni ballclub president Alan Buenavista nga nagbitbit na og 3-1 nga baraha.

Sila si Rechel Bamba ug Mai Suson mitimbre'g 14 puntos matag usa, samtang si Lloyd Chavez miamot og 11 puntos.

Nagkumbinar og 31 puntos sila si Momol Romagos ug Florentino Ecot aron mangu sa opensiba sa AC Troopers ni S/Insp. Dondon Coloscos.

Ang Explorer nagtangag na og 3-1 nga baraha, samtang ang AC Troopers dunay 2-2 win-loss record ning maong liga nga gipadagan ni commissioner Geryl Bukiron sa abag ni Orly Navarro.

Puntos Matag Usa

Unang duwa:

D' LURICS (67) – Cuerbo 17, Lurica 15, Bukiron 10, Arceo 8, Manatad 8, Cuda 6, Yatan 3.

MONTERROYO (55) – Lawas 21, Bodo 14, Secosana 12, Monterroyo 6, Jamz 2.

Ikaduhang duwa:

EXPLORER (73) – Estremos 21, Bamba 14, Suson 14, Chavez 11, Medillo 4, Ouano 4, Buenavista 2, Garcia 2, Nova 2.

AC TROOPERS (70) – Romagos 17, Ecot 14, Oquias 9, Cabahug 6, Ocier 5, Yares 4, Lavador 4, Coloscos 3, Englis 2, Acusar 2, Ferolino 2, Tagalog 2. (BANAT NEWS)