San Remigio milampurnas sa Madridejos sa Governor’s Cup

CEBU, Philippines – Nagmangtas ang All-Star center sa University of San Jose-Recoletos (USJ-R) Baby Jaguars nga si Dave Arnold Ando aron pangulohan ang San Remigio ngadto sa 97-61 nga demolisyon sa Madridejos sa North Division Bracket 4 sa 2nd Cebu Governor’s Cup Inter-Cities and Municipalities Under-21 Developmental Basketball Tournament didto sa Mayor Artemio Masbate Sports Complex sa lungsod sa San Remigio amihanang bahin sa Sugbo.

Igo lamang nga gipatambok ang Madridejos human nakalabaw og sayes puntos sa halftime, 32-28  ubos sa pagtambayayong nilang Bernie Felicidario, Alfonso Quijano ug Reeve John Fajardo gumikan kay sila si Ando ug Guinever Amit nagkumboya’g 15 puntos sa gipabutong 37-7 nga bomba nga maoy nakapausab sa dagan sa duwa pabor sa San Remigio.

Si Ando mihimo og 18 sa iyang 24 puntos sa second half, si Roman Sinadjan mitapos uban ang 18 puntos, samtang si Amit mitampo og 12 puntos sa San Remigio. 

Si Quijano maoy nangu sa Madridejos bitbit ang 21 puntos.

Sa laing duwa, gibaraw sa Medellin ang debut sa Daanbantayan, 90-78 ubos sa pagpangu nilang Riel Veloso ug Fritz Saladaga nga nakatigum og 43 puntos.

Didto sa Samboan Municipal gym, si John Michael France Rosal miposte og 20 puntos ug si Yojildridge Luage dunay 16 puntos sa dihang ang Samboan nakaipsot sa Santander, 80-78.

Sa laing mga duwa sa South Division Bracket 3, si Nino Indoy mitali og 22 sa iyang 33 puntos sa second half aron aswaton ang Ginatilan ngadto sa 85-78 nga kadaogan batok sa Badian, samtang si Rojan 

Montemayor mirehistro og 20 puntos sa dihang ang Alegria milampurnas sa Oslob, 83-68.

Didto sa Alcantara municipal gym, si Mike Anthony Bayaton mibahog og 19 puntos ug sila si Lee Baybayanon ug Charlie Sabanal mitimbre’g 17 puntos matag usa sa dihang gipalaw sa Barili ang debut sa Aloguinsan, 104-81, samtang sila si Kurt Michael Pepito, Roy Vincent Buhawe ug Marjon Zamora nagkumboya og 36 puntos sa dihang gipakaging sa Alcantara ang Moalboal, 64-59.