CCT builders milansang 2-1 sa CELBA tilt

CEBU, Philippines – Nagmaoy si Richard Madrid sa fourth quarter diin miduslak siya og 18 puntos alang sa CCT Builders nga mipilde sa team Jabas, 74-70 sa Cebu Legends Basketball Association (CELBA) Summer League 2018 niadtong Miyerkules sa gabii didto sa Canduman Housing gym sa dakbayan sa Mandaue.

Sa kinatibuk-an, si Madrid adunay 25 puntos aron mangu sa balanseng opensa sa CCT Builders nga miposte na karon og 2-1 nga baraha.

Ikaduhang topscorer sa CCT Builders mao si Roy Ermac nga mikadlit og 10 puntos.

Ang team owner nga si Engr. Chucho Tan nga miiskor og 15 puntos sa ilang 84-75 nga kadaogan batok sa Explorer niadtong Sabado, dili kaayo maayo og produksiyon diin igo lang siya mihipos og otso puntos.

Si Peter Apura maoy nangu sa tulo ka players sa Jabas nga nakaiskor og double figures nga mitabas og 14 puntos.

Ang CCT Builders nga gipaluyohan nilang Dr. Jun Borces, Roy Ermac, Eboy Quiñahan, Genemar Cena ug Nelson Solana gibiyaan og 11 puntos human sa tulo ka kuwarter, 46-57.

Bisan pa sa maong labaw, ang CCT Builders wala mapagngi sa paglaum ug padayong nakigbisog ug nailog nila ang komportabling labaw sa 3-point shots ni Ermac, 68-64 sa nahibiling 1:07 sa duwa.

Nakasikit ang Jabas, 70-72 ug mahatod unta nila ang duwa ngadto sa overtime, apan mikagar ang ilang mga itsa.

Ang free throws ni Madrid maoy mitak-op sa kadaogan sa CCT Builders.

Ang liga ubos sa superbisyon  sa  outgoing president nga si S/Insp. Dondon Coloscos sa abag sa mga technical committee nga silang Ramel Baclay, Wendel Oquias, Engr. Roel Tayag, Willy Medillo, Lloyd Chavez ug Richard Limosnero.

PUNTOS MATAG USA

CCT Builders (74) – Madrid 24, Ermac 10, Solana 9, Tan 8, Borces 8, Alburo 6, Bucabal 3, Goc-ong 

2, J. Flores 2, Beldera 2.

JABAS (70) – P. Apura 14, Linao 11, Apuro 10, Terol 9, Apura 8, Suico 7, Abapo 5, Cabatingan 3, 

Comiso 3.