Martinez bayani sa yoyi’s pastries sa FYA Summer League 2018

CEBU, Philippines – Ang krusyal nga itsa ni Junjie Martinez sa kilid nga bahin sa nahibiling singko segundos sa fourth quarter maoy mipadaog sa Yoyi’s Pastries & Dessert batok sa Angel Mary Pawnshop, 98-97 sa kulbahinam nilang duwa sa FYA  Summer League 2018  Season 21 basketball tournament niadtong Domingo didto sa Vicente Sotto gym sa Barangay Punta Princesa ning dakbayan sa Sugbo.

Si Martinez miiskor lang og siyete puntos, apan ang iyang mabayanihong duwa maoy nagluwas sa  defending champion Yoyi's Pastries nga naglumpayat sa kalipay.

Ang team manager nga si Ahlmark Albaracin mao mismo ang nangunay  pagpangu sa iyang koponan nga misansan og 18 puntos.

Nakakuha sab siya og suporta gikan ni Juls Aglipa nga miamot og 17 puntos, samtang si Jao Rabadon mitampo’g 16 puntos sa Yoyi's Pastries  & Dessert nga padayong nagsolo sa liderato bitbit ang 4-0 nga baraha.

Ang Angel Mary Pawnshop ni team playing manager McLain Alkuino gipangulohan sab ni Val Ramirez pinaagi sa iyang 26 puntos, gisundan ni Clark del Mar nga adunay 16 puntos.

Sila si Dodi Endrina ug Ashley Mendoza nagkumboya’g 22 puntos sa Angel Mary Pawnshop nga adunay 1-3 win-loss record.

Sa laing duwa, ang Soontit Construction milumpag sa The Bros sa iskor nga 89-85 aron pag-ugbok og 2-2 nga baraha.

Gipangulohan  ni Mervin Manila ang kadaogan  nga milansang og 25 puntos,   si Christian Laud miambit og 14 puntos, samtang si  ballclub president Dexter Caballero   miligwat og  10 puntos sa Soontit Construction ni  playing team manager John Soontit

Sila lang si Jayson Largo ug Milfred Sampilo ang nakaiskor og double figures sa The Bros nga nagkumboya’g 49 puntos. Si Largo mihakot og  27 puntos, samtang si Sampilo miabuno’g   22 puntos.

Ang The Bros nilang Raymart Gillangao ug Tiny Baran wala pa’y daog sud sa tulo ka duwa ning maong liga nga nahimo pinaagi sa paningkamot ni ballclub president Dexter Caballero  nila  ni Brgy. Capt. Boy Atillo, Arnel Trinidad ug Baeng Medalle nga miabag sa pagpadagan sa mga duwa.

PUNTOS MATAG USA

Unang duwa:

YOYI’S PASTRIES (98) – Albaracin 18, Aglipa 17, Rabadon 16, Wabe 14, Martinez 7, Rara 4, Salvador 4, Mata 3.

ANGEL MARY PAWNSHOP (97) – Ramirez 26, Del Mar 16, Endrina 12, Mendoza 10, Encarguez 7, Alkuino 6, Godfredo 4, Samson 2, Cabreros 2.

Ikaduhang duwa:

SOONTIT CONS. (89) – Manila 25, Laud 14, Caballero 10, Tabares 8, Regudo 8, Manalili 7, Macachor 6, Laput 4, Garbo 1.

THE BROS (85) – Largo 27, Sampilo 22, Gillangao 8, Sy 6, Abella 5, T. Baran 4, Baran 4, Arreglo 2, Demol 2.