Krizia, Lesin parehong nakaipsot sa ilang mga kaatbang
CEBU, Philippines – Naglumpayat sa kalipay ang Krizia RM-EM Delivery Solutions human ilang nataak ang tungason nga kadaogan batok sa Villaflores, 63-59 sa Cebu Legends Basketball Association (CELBA) Summer League 2018 niadtong Miyerkules didto sa Canduman Housing gym, dakbayan sa Mandaue.
Sa maong kadaogan, ang Krizia ni Arthur Lelis nakigsawo na karon sa liderato uban sa LEALAC Sunday Club sa managsama nilang baraha nga 2-0.
Wala damha nga modaog ang Krizia sa maong duwa kay pirme silang naggukod, gani gisirohan pa sila, 0-17 atol sa first quarter. Diha na sila nakalabaw sa kapin tres minutos ang nahibiling oras sa fourth period.
Nagkumbinar og 21 puntos sila si Badon Herbieto ug Vedol Navarro aron mangu sa kadaogan sa Krizia.
Sa main game, ang team Lesin mipilde sa Monterroyo, 66-61 alang sa ilang 1-1 nga baraha.
Si Rogelio Bordario mibombardiyo og 10 puntos sa team Lesin nga maoy nikontrolar sa kinatibuk-ang duwa.
Labaw og siyete puntos ang team ni Gilbert Lesin sa sayong bahin sa third period, 29-22, apan natipakan kini ngadto na lang sa 31-27 human sa running shot ni playing team manager Dr. Raul Monterroyo nga nakapakulba sa aksiyon.
Sa pagpangulo ni Ramil Estremos, ang Monterroyo milabaw sa ikaduha ug katapusang higayon, 51-49 sa fourth, apan dali kaayo kining napapas sa team Lesin pinaagi sa 8-0 run ug alang sab sa ilang komportabling labaw, 57-51 sa nahibiling tres minutos sa duwa.
Nakasikit pa ang Monterroyo, 57-58 sa katapusang 1:40 sa tira ni Alexam Amaga, apan napawong ang ilang paglaum kay ang ilang luag nga depensa sa ibabaw nga bahin gipahimuslan sa team Lesin.
Si Estremos maoy topscorer sa Monterroyo nga mibagnos og 14 puntos, gisundan ni Florentino Ecot nga adunay 11 puntos.
Ang Monterroyo ug Villaflores nagkuyog sa kinailawmang bahin sa standing sa ilang 0-2 nga baraha.
Ang liga namugna pinaagi sa paningkamot ni ballclub president S/Insp. Dondon Coloscos ug sa bise presidente nga si Engr. Tony Alcover. Ang mga duwa gipadagan sa mga technical committee nga gilangkuban nilang Ramel Baclay, Wendel Oquias, Engr. Roel Tayag, Titi Medillo, Lloyd Chavez ug Richard Limosnero.
PUNTOS MATAG USA
Unang duwa:
KRIZIA (63) – B. Herbieto 11, Navarro 10, Abelong 7, Sayson 6, Miñoza 6, D. Herbieto 6, Lelis 4, Alilin 4, T. Herbieto 4, Oquias 3, Padayogdog 2.
VILLAFLORES (59) – Gemongala 15, Dextrose 9, Prieto 8, Genobia 8, Cañas 6, Villaflores 6, Alcontin 2, Cabarles 2, Alabat 1.
Ikaduhang duwa:
LESIN (66) – Bordario 10, Sicad 9, Budiongan 8, Ocier 8, Rosacena 8, Damaolao 6, Lungtad 5, Pacquiao 4, Lesin 4, Limosnero 3, Villarosa 2.
MONTERROYO (61) – Estremos 14, Ecot 11, Mendoza 8, Amaga 6, Jacalan 4, Monsanto 3, Tantuan 3, W. Landiza 2, J. Landiza 2, Alvarez 2, Monterroyo 2, Armero 2, Sugay 2.
- Latest
