Dagkong sangka nagpaabot sa Omega boxers

CEBU, Philippines — Human sa sunod-sunod nga dagkong mga  kadaogan sa gawas sa nasud, ang mga protagonista sa Omega Boxing Gym naglantaw sa unahan og mas baskug  nga  kampanya sa tibuok tuig.

Sila si Jessie Cris Rosales ug Kenny Demecillo maoy mialsa sa Omega gym ngadto  sa impresibong kadaogan   sa balwarte sa ilang mga kontra. 

Si Rosales mipakurat sa tibuok kalibotan sa boksing human niya gipatug ang kanhi Olympian  nga si Ibrahim Balla aron  mailog ang WBA Oceania featherweight title niadtong Marso 11 didto sa Altona North, Australia.

Lima ka adlaw ang milabay, si Demecillo na usab ang misurprisa sa mga fans sa Russia dihang iyang gipaundang sa fourth round ang highly-rated bantamweight nga si Vyacheslav Mirzaev.

“It’s still early in the year and our fighters have already showed amazing performances. This makes us very excited,” matud pa ni Omega Sports Vice President Jerome Calatrava sa  press conference kagahapon didto sa Manggahan restaurant.

Si Omega head trainer Julius Junco miingon nga sila si Rosales ug Demecillo klaro nga mosaka sa ranking sa tagsa-tagsa nila ka dibisyon ug kun adunay tanyag nga world title fight, dili kini nila balibaran.

Gidugang ni Calatrava nga gawas sa duha, aduna sab sila’y plano alang sa ubang Omega boxing prospects sama nila ni  Jhack Tepora, Jhalil Payao, Jason Canoy, Tomjune Mangubat ug Christian Araneta.

“We are still committed to our goal of developing future stars and world champions. The plan is to give our boxers quality fights inside or outside the country,” matud ni Calatrava. 

“Aside from making our own fight cards, we are also willing to tie-up with other boxing promotions.”