Michele sabik nang makasama ang tropa
Michele Gumabao
MANILA, Philippines — Sabik na si Binibining Pilipinas-Globe Michele Gumabao na makasama ang kanyang mga katropa sa Creamline Cool Smashers sa kampanya nito sa Premier Volleyball League Reinforced Conference.
Nagpasalamat si Gumabao sa suportang ibinigay ng pamunuan ng Cool Smashers sa kanyang kampanya sa katatapos na Binibining Pilipinas coronation night.
Sa kanyang instagram post, nakipagkita si Gumabao sa kanyang Creamline family sa isang meeting kung saan kasama ang mga manlalaro ng Cool Smashers partikular na si UAAP MVP Alyssa Valdez na isa sa nagsilbing hurado sa Binibining Pilipinas pageant.
“Thank you to my Rebisco Creamline Coolsmashers family for not only allowing me to join and focus on my journey to the crown but for being behind me every step of the way,” wika ni Gumabao sa kanyang post.
Dumalo rin si Thai mentor Tai Bundit na siyang magsisilbing head coach ng Cool Smashers gayundin sina seasoned setter Jia Morado, Maria Paulina Soriano, Rosemarie Vargas, Coleen Bravo, Rizza Jane Mandapat, Alex Cabanos at libero Melissa Gohing.
Makakasama ng Cool Smashers si Gumabao sa Barangay Creamline Clinic-PVL On Tour ng tropa ngayong araw sa Pampanga.
“Can’t wait to play alongside these girls. Catch us on our Barangay Creamline clinic on Sunday at Pampanga for PVL on Tour,” ani Gumabao.
Magsisimula ang Reinforced Conference sa Mayo kung saan mapapalaban ang Cool Smashers sa matitikas na tropa gaya ng three-time PVL champion Pocari Sweat, Pay Maya, Tacloban Fighting Warays, Petro Gazz Angels at BanKo Perlas Spikers.
- Latest
