Ancajas-Sultan fight lagmit dili mahitabo sa las vegas
CEBU, Philippines — Ang giatngan nga away tali sa duha ka Pinoy’ng kampiyon nga sila si IBF junior bantamweight champion Jerwin Ancajas (29-1-1, 20KOs) ug Jonas Sultan (14-3, 9KOs) lagmit dili na mahitabo didto sa Las Vegas.
Si Ancajas gikatakda unta nga modepensa sa iyang IBF title batok ni Sultan sa undercard sa world welterweight championship tali nilang Terence Crawford ug Jeff Horn karong Abril 14 didto sa Mandalay Bay Resort and Casino sa Las Vegas.
Apan giuswag ang maong promosyon sa wala pa hisayring petsa human si Crawford nakahiagum og injury atol sa iyang training.
Sa dihang nahinabi ni Steve Kim sa boxingscene.com, si international matchmaker Sean Gibbons
nga usa sa nagkupot ni Ancajas nagkanayon nga si Top Rank promoter Bob Arum naglantaw nga paawayon si Ancajas didto sa California diin daghan ang mga Pinoy didto.
“At the moment we’re waiting for our promoter Top Rank, Bob Arum has a tremendous vision coming up for Jerwin. He sees Jerwin fighting in the California market, up in San Francisco, maybe Los
Angeles,” matud pa ni Gibbons ngadtong Kim.
Gipanglantawan ni Gibbons nga mag-abot na gyud ibabaw sa ring sila si Ancajas ug Sultan sa hinapos nga bahin sa Mayo o sa unang semana sa Hunyo.
Kun ugaling mahitabo na, mao kini ang labing unang higayon sud sa dul-an usa ka siglo nga duha ka Pinoy’ng boksidor ang mag-abot sa usa ka world championship fight.
Katapusan kining nahitabo niadto pang 1925 sa dihang si Pancho Villa nakadepensa sa iyang world flyweight title batok ni Clever Sencio didto sa Wallace Field nga mao na karon ang Rizal Park sa
kaulohan.
- Latest