Kalandrakas sa Governor’s Cup volleyball
CEBU, Philippines — Maghinampakay na sab ang mga spikers sa North ug South sa nagkadaiyang binyu sa probinsiya sa Sugbo gumikan kay ang mga duwa sa eliminasyon banatan na’g balik sa 2018 Cebu Governor’s Cup Under-18 Inter Cities and Municipalities Developmental Volleyball Tournament karong adlawa.
Karong hapon didto sa Poro municipal gym sa isla sa Camotes, ang Poro mo-host sa Consolacion, ang San Francisco makigtige sa Cordova, samtang ang Mandaue City makig-atbang sa Liloan.
Sa main game, mag-unay ang San Francisco ug Poro.
Didto sa Balamban Sports Complex, magbangga ang Sogod ug Carmen, Catmon batok Asturias ug Danao City batok Balamban.
Karong Domingo didto sa SanFran municipal gym sa Camotes, ang Liloan mohamag sa Cordova, ang Poro makigsangka sa Mandaue, samtang ang Consolacion manulong sa San Francisco.
Didto sa Tuburan, ang host makigharong sa wa’y pildeng Santa Fe, samtang ang Medellin makigtige sa Tabogon.
Sa aksiyon didto sa South karong adlawa, magpinaksitay ang Carcar City ug Talisay City, samtang ang Minglanilla mo-host sa Argao didto sa Minglanilla Sports Complex.
Sa Dumanjug municipal gym, ang Dumanjug makigduwa sa Moalboal ug ang Alegria makig-engkuwentro sa Ginatilan.
Sa Domingo, ang Samboan ug Santander mag-abot sa Samboan Municipal Gym, samtang ang Alegria batok Moalboal ug Dumanjug batok Ginatilan duwaon sa Alegria municipal gym.
- Latest