CCSC Grassroots program pahugtan

CEBU, Philippines — Pahugtan pa sa kagamhanan sa siyudad sa Sugbo ang summer grassroots training program sa Cebu City Sports Commission (CCSC) aron makahulma pa og mga lig-ong talento alang sa Central Visayas Regional Athletics Association (CVIRAA) Meet ug Palarong Pambansa.

Ang tinuig nga sports program sa CCSC sugdan karong Abril 9 hangtod  sa Mayo 5.

“I have always wanted public school athletes to be strong,” matud pa ni Cebu City councilor Joy Augustus Young sa usa ka press conference kagahapon didto sa The Port Seafood House sa Waterfront-Lahug.

Gisugdan niadtong tuig 2011, ang maong libre nga summer grassroots program nga gipasiugdahan ni CCSC chairman Edward Hayco mohatag og kahigayonan sa mga kabataan  nga makasuway sa nagkadaiyang matang sa paugnat sa kusog sama sa basketball, archery, air rifle, arnis, badminton, beach volleyball, boxing, chess, muay thai, dancesports, futsal, karatedo, lawn tennis, pencak silat, scrabble, sepak takraw, softball/baseball, table tennis, taekwondo, touch rugby, track and field, volleyball, weightlifting, wushu ug gymnastics.

Ning higayona, mas gipalapdan pa sa CCSC ang ilang programa ug mga piniling tunghaan sa siyudad sa Sugbo ang himuon nilang training venue.

Sa North district, ang mga tunghaan nga kapahigayonan sa maong training camp mao ang City Central School, Hipodromo Elementary School, Lahug Elementary School, Mabolo Elementary School, Tejero Elementary School, Zapatera Elementary School, Bo. Luz Elementary School ug Talamban Elementary School.

Alang sa taga South district, mahimong mosalmot sa  training  sa Don Vicente Rama Memorial Elementary School gym, Pardo Elementary School, Mambaling Elementary School, Labangon Elementary School, Punta Princesa Elementary School, Guadalupe Elementary School, Inayawan Elementary School, San Nicolas Elementary School, Oppra Elementary School, Tisa Elementary School ug Cebu City Sports Institute.