James mipas-an sa Cavs

CEBU, Philippines — Kay wala ang lima nila ka players ug ingon man ang ilang coach, literal nga gipas-an ni LeBron James sa iyang mga abaga ang Cleveland Cavaliers ngadto sa 132-129 nga kadaogan batok sa NBA Eastern Conference leader Toronto Raptors nga gikahimuot og maayo sa ilang fans kagahapon didto sa Quicken Loans Arena sa Cleveland, Ohio.

Ang three-time NBA champion ug four-time MVP mibahog og 35 puntos, 17 ka assists ug pito ka rebounds,   ang makapakurat kay wala  siya makahimo og  turnover. Gumikan niini, si James mitala og NBA record alang sa labing daghang assists nga wala’y bisan usa ka turnover.

Ang katapusang assist ni James iyang gilawog ngadto ni Kevin Love nga milansang sab dayon og tres nga nakahatag og 128-124 nga labaw sa Cavs. Mao pa lamang kadto ang ikaduhang duwa ni Love sa iyang pagbalik gikan sa injury, apan nakamaneho siya pagkadlit og 23 puntos ug 12 ka rebounds. 

Wala sab magpabitin si George Hill nga mipupo og 22 puntos alang sa Cavs nga nagbitbit na karon og 42-29 record.

Si Kyle Lowry adunay 24 puntos sa Raptors nga pabilin gihapong naghari sa liderato sa East bitbit ang 53-19 nga baraha.

Sa laing duwa, si Dwight Howard mipabuhagay og 32 puntos ug milangkat og 30 ka rebounds nga maoy labing unang 30-30 performance sukad niadtong 2010 ug ikaduha lamang sud sa 36 ka tuig  aron pangulohan ang Charlotte Hornets nga mikunis-kunis sa Brooklyn Nets, 111-105.

Si Howard maoy labing unang  30-30 player sukad si Love miratsada og 31 puntos ug 31 ka rebounds sa kadaogan sa Minnesota Timberwolves batok sa New York Knicks walo ka tuig na ang milabay. 

Ang labing uwahing nakamugna og 30-30 sa wala pa si Love mao si Moses Malone niadtong 1982.

Didto sa Philadelphia, sila si Dario Saric, J.J. Redick ug Robert Covington mitali og 15 puntos matag usa sa dihang gilampaso sa Sixers ang bisitang Memphis Grizzlies, 119-105 alang sa ikaupat nilang sagunson nga daog.

Mikuha sab og atensiyon si LaMarcus Aldridge nga mipabuto og 27 puntos sa dihang giusban og pilde sa San Antonio Spurs ang Washington Wizards, 98-90. 

Mao kadto ang ika-18 nga sunod-sunod nga higayon nga ang Wizards nasugamak didto sa San Antonio.

Sa uban pang mga resulta, si DeAndre Jordan dunay 25 puntos ug 22 ka rebounds sa dihang gipakaging sa Los Angeles Clippers ang Milwaukee Bucks, 127-120, samtang si Anthony Davis mikulit og 28 puntos ug 13 ka rebound sa   New Orleans Pelicans nga mibuntog sa Indiana Pacers, 96-92.