Tinagsip sa NBA

Coach Lue temporaryo una mobiya sa Cavs

CEBU, Philippines — Si coach Tyronn Lue mipahibawo nga temporaryo una siyang mobiya sa Cleveland Cavaliers aron atimanon ang isyu kabahin sa iyang panglawas nga iyang gihambin sud sa pipila na ka mga bulan.

Matud pa ni Lue nga duna siya’y gibatyag sa iyang dughan ug uban pang makahasol nga sintomas, apil na ang pagkawa niya’y katug, apan wala gyud masuta kun unsa’y iyang sakit bisan og kapila na siya gipaubos sa  medical examination.

Gitataw hinuon ni Lue nga lagmit mga usa ka semana ra siya mopahuway, apan ang tanan mag-agad kun unsa’y rekomendasyon sa iyang mga doktor. Samtang wala siya, ang iyang assistant nga si Larry Drew mao una ang modala sa ilang team.

Draymond Green nayayay na sab

Bag-o pa gani nakabalik og duwa, apan nayayay na sab dayon si Draymond Green.

Ang All-Star forward sa Golden State Warriors wala makatiwas sa ilang duwa batok sa San Antonio Spurs kagahapon human makahiagum og bun-og sa iyang bat-ang sa ikaduhang kuwarter.

Mao kini ang hinungdan nganong nabokya si Green sa 89-75 nilang kaparotan sa Spurs.

Gawas ni Green, injured sab ang sinaligang mga bitoon sa Warriors nga sila si Kevin Durant, Stephen Curry ug Klay Thompson. Gipaabot hinuon nga makabalik na og duwa silang tanan sa dili pa magsugod ang playoffs sunod bulan.