Aldridge miagak sa Spurs

CEBU, Philippines — Nagdilaab ang opensa ni LaMarcus Aldridge sa katapusang kuwarter aron agakon ang San Antonio Spurs ngadto sa 89-75 nga kadaogan batok sa Golden State Warriors sa NBA kagahapon didto sa AT&T Center sa San Antonio, Texas.

Daw sa napagngan hinuon og kahayag ang Warriors kay miduwa nga wala ang tanan nilang bitoon nga sila si Stephen Curry, Klay Thompson ug Kevin Durant nga pulos nagpaalim pa sa ilang injury.

Napun-an pa ang kalbaryo sa Warriors human si Draymond Green na-injured ang bat-ang sa ikaduhang kuwarter.

Ang Spurs miabante og 16 puntos sa usa ka higayon, apan ang Warriors milusad og init nga rally hinungdan nga nailog nila ang labaw, 63-61 nga ila pang giinat ngadto sa 65-61 human sa itsa ni Nick Young pagsugod sa katapusang kuwarter.

Apan sa kalit lang nagmangtas si Aldridge diin kini miiskor og 19 sa sunod nga 22 puntos sa  Spurs nga maoy nahimo nilang yawi sa kadaogan.

Si Aldridge mitapos uban ang 33 puntos, 12 ka rebounds ug tulo ka blocks, samtang sila si Patty Mills ug Danny Green nagkumboya’g 23 puntos sa Spurs nga mipabuhi sa ilang tsansa nga makasud sa playoffs human mikatkat sa ikalimang puwesto sa West bitbit ang 41-30 nga baraha.

Didto sa Cleveland, gisugat sa Cavaliers ang pagbalik ni Kevin Love pinaagi sa usa ka masipang buto, apan si LeBron James maoy nahimong bida sa 124-117 nilang kadaogan batok sa Milwaukee Bucks.

Si James mipabuhagay og 40 puntos, 12 ka rebounds ug 10 ka assists sa ikatulo niyang ‘triple-double’ sa miagi nilang upat ka duwa. Mao kadto ang ika-16 niyang ‘triple-double’ karon   nga   season   ug     ika-71 kinatibuk-an sa iyang karera.

Sa pagtaak og balik ni Love sa korte, gibagat sab og dili maayong balita ang Cavs gumikan kay ang ilang coach nga si Tyronne Lue dili usa makatimon kanila sud sa pipila ka duwa gumikan kay duna kini isyu sa panglawas nga kinahanglan niyang atimanon.

Si Giannis Antetokounmpo dunay 37 puntos ug walay sipyat sa 11 niya ka free throws, apan naminghoy gihapon gumikan kay ang Bucks natagak ngadto sa ikawalong puwesto sa Eastern Conference human ang Miami Heat mipilde sa Denver Nuggets, 149-141, sud sa duha ka overtime.