Alab maninguha nga modaog batok Indonesia

CEBU, Philippines — Gipahimangnoan ni Alab Pilipinas coach Jimmy Alapag ang iyang mga batos nga kinahanglan silang modaog batok sa CLS Knights Indonesia aron mahayagan pa ilang tsansa sa top two spots nga mohatag kanila og ‘twice-to-beat’ advantage sa playoffs.

Ang Alab sud na sa playoffs  bitbit ang 12-6 nga baraha, apan gusto ni Alapag nga mosaka pa sila gikan sa No. 4 seed. Ang Alab adunay nahibiling duwa pulos batok sa CLS Knights.

Ang Alab unang makigsangka sa Indon ugma didto sa Caloocan City, sundan sa katapusang duwa didto na usab sa Indonesia karong Domingo.

Ang Alab nagsunod sa Chong Son Kung Fu (14-5), Hong Kong Eastern Lions (12-5) ug Mono Vampire Thailand (13-6).

Si Alapag nagkanayon nga mag-ampo sila nga mapilde ang Momo Vampire ug Hong Kong Lions  sa mga nahibilin nilang duwa   aron makuha nila ang no. 2 spot.  

Dili hinuon angay kompiyansaan ang  Indonesia tungod kay determinado sila nga makuha ang daog ilabi na nga naningkamot sila nga makasud sa top eight. Ang Indonesia adunay  record nga 5-13. (BANAT NEWS)