Luke Genesis awtomatik nang sud sa semis

CEBU, Philippines — Dili na malalis, ang Luke Genesis seguro na masulod sa top 2 sa elimination round sa Cabangahan Sunday Ballclub Season 6 basketball tournament dihang midaog na sab kini batok sa Kyffer, 68-59 niadtong Domingo didto sa Cabangahan, Consolacion gym.

Nagsolo na karon sa liderato uban ang 6-1 nga baraha, ang Luke Genesis nga makabaton og ‘twice-to-beat’ incentives unya sa semifinals, miarangkada dayon aron moposte og 16-5 human sa first period.

Sila lang si Alvin Capuyan ug Archie Jay Maraño ang nakaiskor sa Kyffer sa unang kuwarter sa ilang dos ug tres puntos matag usa.

Miburot pa ang labaw ngadto sa 14 puntos, 28-14 nga maoy labing dako nga natala sa nahibiling 3:10 sa second period.

Medyo nakasinati og kalisud sa ilang opensa ang Luke Genesis tungod sa kahigpit sa depensa sa Kyffer. Nakaigwalis ang Kyffer, 32-all sa 3-point play ni Jethro Bihag nga nakahulga sa Luke Genesis.

Ubos sa pagtimon ni playing team coach/owner Nathaniel ‘Telly’ Herbieto, ang Luke Genesis miusab sa ilang game plan ug ilang ‘man’ ang Kyffer nga nakatabang sa pag-inat sa ilang labaw.

Ang nakahatag og dakong danyos sa Kyffer mao ang tandem nilang  Palmer Dionson ug Brian Maraño nga maoy misalida og maayo sa third quarter. Si Palmer mikamada’g 15 puntos, apil na ang talagsaon niyang 4-point play aron pangulohan ang Luke Genesis nga wala na molingi pa human milabaw 37-33 sa tunga-tungang bahin sa maong kuwarter, samtang si Maraño adunay otso, apan krusyal kaayo ang iyang mga itsa.

Miarte sab si Jerry Prieto diin miantog kini og 11 puntos sa kadaogan.

Ang Kyffer ni playing manager Alvin Amores nga nalabay sa ikaduhang dapit uban ang 5-2 nga baraha, gipangulohan ni Wahab Longakit pinaagi sa iyang 10 puntos.

Sa laing bahin, ang defending champion Riandresen ni konsehal Beinsin Herbieto midaog pinaagi sa default batok sa Amalyl.

Ang liga nga namugna pinaagi sa paningkamot sa presidente niining si Arthur Lelis ug  bise presidente Beinsin Herbieto, gipadagan ni commissioner Telly Herbieto sa abag nilang Wendel Oquias,  Mar Anthony Lopez ug Jopeter Cillo.

Ang tinuig nga liga gipaluyohan sab sa Cabangahan Barangay Council ubos sa liderato ni Brgy. Capt. Edwin Miñoza.

Puntos Matag Usa

LUKE GENESIS (68) – Dionson 15, Prieto 11, B. Maraño 8, Mata 8, Codeniera 6, Navarro 4, Balili 4, T. Herbieto 2, Cabahug 2, Coloscos 2, Englis 2, E. Herbieto 2, Pokster 2.

KYFFER (59) – Longakit 10, Osorio 9, Bihag 8, F. Paredes 8, Sevillino 6, Orbiso 5, Liporada 4, Padayogdog 4, AJ Maraño 3, Capuyan 2. (BANAT NEWS)