Elijah Homes nakaipsot batok Wilkris sa BLBA
CEBU, Philippines — Ang Elijah Homes/A. Lopez mikolapso sa second half apan nakabawi ra sab dayon aron pag-eskapo ngadto sa 136-135 nga kadaogan batok sa Wilkris sa the Barangay Labangon Basketball Association (BLBA) 2018 Season First Conference diha sa Labangon Sports Complex.
Ubos sa pagtimon ni coach Ramesh Mulchandani, ang Elijah Homes maoy nikontrolar sa duwa gikan sa pagsugod hinungdan nga sila mibulhot ngadto sa 68-53 nga bintaha sa halftime. Ila kining namintinar human sa ikatulong kuwarter, 104-92.
Ang Wilkris milusad og mainit nga resbak sa katapusang hunat sa duwa apan ang Elijah Homes ni team owner Jeson L. Guardo mipakita og igong kadasig aron pag-ipsot niini ngadto sa kulbahinam ug makutas nga daog.
Si kanhi pro ug commercial veteran Jercules Tangkay mipabuto og 46 puntos uban ang pito ka rebounds, tulo ka steals ug duha ka assists, samtang si Resty Getubig midugang og 22 puntos ug upat ka assists sa Elijah Homes.
Lain pang tulo nga mihipos og double figures. Sila si Jonel Villarosa ug Dennis Acebron nagkumboya og 35 puntos, samtang si Trifon Nacua mi-iskor og 10 sa Elijah Homes nga nakigtabla na karon sa ikatulong dapit sa standings uban ang Wilkris, CRV/Fatima ug Dtops bitbit ang managsamang 2-1 nga baraha.
Ang Dtops mikadlit sa ikaduha nilang daog human giparotan ang CIT-Alumni, 115-104.
Ang CIT-Alumni nalukapa sa ikatulo nilang sagunson nga duwa hinungdan nga nakigduyog na sila karon sa Station 6 ug JG Travel and Tours sa tumoy.
Sa gihapon, ang Trangia Sportswear ug Rufrance PNP maoy nagdominar sa liderato kay parehong way pilde sa tulo ka duwa. (BANAT NEWS)
- Latest
