Cavs, Warriors nakabawi

CEBU, Philippines — Pulos gikulata sa injuries ang Cleveland Cavaliers ug Golden State Warriors, apan nakahimo sila pagsakmit og daog batok sa tagsa-tagsa nila ka mga kaatbang kagahapon sa NBA.

Ang duha ka NBA finalists nakatagamtam og mga kapildehan sa mga miagi nilang duwa tungod sa kakuwang sa players, apan pulos sila mibida kagahapon.

Si LeBron James mirehistro sa ika-70 niya nga career triple-double aron baswaton ang Cavaliers ngadto sa 114-109 nga kadaugan batok sa Chicago Bulls didto sa United Center sa Chicago, Illinois.

Ang four-time MVP grabeng nakabagnos tungod kay unom niya ka mga sinaligang teammates ang nanga-angol ug wala kauban didto sa Chicago. Kini mao sila si All-Star Kevin Love, Rodney Hood, Kyle Korver, Larry Nance, Cedi Osman ug Tristan Thompson.

Mismo ilang coach nga si Tyronn Lue wala katiwas sa duwa tungod kay naglain ang pamati niini. Si James mikulit og 33 puntos uban ang 13 ka rebounds ug 12 ka assists.

Didto sa Phoenix, Arizona, ang Warriors misung usab ug mipukan sa home team nga Suns, 124-109, sa pagpangulo sa mga bench players. Ang di kaayo ilado nga si Quinn Cook maoy mibida sa defending champion human siya mitira og 28 puntos.

Sa ubang mga duwa, ang Milwaukee Bucks misungag sa Atlanta Hawks, 122-117, ang Washington Wizards mipilde sa Indiana Pacers, 109-102, ang Houston Rockets midaog na sab batok New Orleans Pelicans, 107-101, ang Brooklyn Nets milit-ag sa Dallas Mavericks, 114-106 ug ang New York Knicks mipigsat sa New Orleans Pelicans, 124-101. (BANAT NEWS)