Pacquiao abli pa ang linya ni Roach

CEBU, Philippines — Wala pa hingpit sirad-i ni Manny Pacquiao ang pultahan ngadto ni Freddie Roach, ang responsabli pagbaid sa iyang abilidad sukad pa niadtong tuig 2001. 

Matud pa sa bugtong eight-division world champion sa kasaysayan sa boksing, nga dili pa final ang tanan kabahin  sa  kuhaon niyang trainer alang sa giplano niyang comeback fight karong Hunyo 24. Sa dihang gisukit-sukit kun si Roach pa ba maoy iyang piyalan sa iyang training nga lagmit magsugod na sunod bulan, si Pacquiao mitubag nga usa kini ka butang nga kinahanglan niyang desisyonan.

Si Roach nagkanayon nga sa miaging semana mikontak siya ni Pacquiao human miulbo ang taho nga moaway kini og balik. Gihimo kini sa Hall of Fame trainer dili lamang kaduha, apan lima ka higayon. Hangtod karon, wala gihapon siya makadawat og tubag sa Pinoy ring star.

Si Pacquiao bag-o  lang mianunsiyo nga hapit na siya makaplansa og kasabotan uban sa Golden Boy Promotions alang sa usa ka away batok ni WBA welterweight champion Lucas Matthysse didto sa Kuala Lumpur, Malaysia.

Wala pa’y kontrata nga napirmahan, apan si Pacquiao miinsister nga maselyado kini sa dili madugay.