Arum mihimakak pasiatab ni Pacquiao
Emmanuel B. Villaruel (Banat) - March 10, 2018 - 12:00am

CEBU, Philippines — Gihimakak ni Top Rank promoter Bob Arum ang pasiatab ni Manny Pacquiao nga ‘final’ na ang away niini batok ni WBA welterweight champion Lucas Matthysse karong Hunyo 24 didto sa Kuala Lumpur, Malaysia.

Sa usa ka detalyadong press conference niadtong Huwebes sa gabii, si Pacquiao nagkanayon nga ang umaabot niyang away pormal nga i-anunsiyo karong Marso 22 didto sa Kuala Lumpur ug pagasundan kini og press tours sa mga dagkong dakbayan sa Asya sama sa Beijing, Tokyo, Macau ug Hong Kong.

Dugang niini, gipahibawo ni Pacquiao ang iyang plano nga maglabanglabang siya gikan sa Manila padulong sa General Santos City  sugod sa tunga-tungang bahin sa Abril alang sa iyang training camp ug ingon man pagtuman sa mga politikanhon niyang obligasyon isip senador sa Pilipinas.

Apan gisalikway kining tanan ni Arum. Matud pa sa beteranong promoter nga ang mga Malaysian nga magpapatigayon nga buot mopaluyo sa away ni Pacquiao hangtod karon wala pa makapakita nga duna sila’y pundo pagpahigayon niini.

Sayod hinuon si Arum nga gusto ni Pacquiao moaway didto sa Malaysia, apan hangtod wa’y kuwarta nga mopatim-aw, pabiling maglutaw sa hangin ang plano niini.

“They’re (Pacquiao camp) hoping to do a deal in Malaysia. I haven’t been handling that deal. They’ve been handling that deal themselves. Hopefully the money, in the form of a deposit, turns up,” matud pa ni Arum sa dihang nahinabi ni Keith Idec sa boxingscene.com.

“The Malaysia part is up in the air. I don’t know these Malaysian people. If they put up the money, it’ll happen, happily. But do I know whether the money will be put up? No, I don’t. It’s as simple as that,” dugang pa niya.

Miinsister si Arum nga wala pa natagik sa bato ang tanan, apil na kun kinsa’y makontra sa Pinoy ring star, kansang karera gituhoan sa uban sumasaop na. Apan kun ugaling magmagahi si Pacquiao nga mo-promote sa iyang away didto sa Malaysia, andam motabang si Arum sa bugtong eight-division world champion kun ugaling iyang serbisyo gikinahanglan.

Philstar
  • Latest
Latest