Warriors miresbak sa Thunder

CEBU, Philippines — Human masagunsoni og duha ka pilde sa Oklahoma City, pait nga panimalos maoy gilabay sa Golden State Warriors ngadto sa Thunder.

Si Kevin Durant mipabuhagay og 28 puntos sa dihang gilat-an sa Warriors ang Thunder, 112-80, sa NBA kagahapon didto sa Oracle Arena sa Oakland, California.

"We're champions. We're 46-14 and we've got one of the best road records in the league," matud pa ni Durant kabahin sa naglagiting nilang kadaogan. "We've been doing this the last two years. We've got to be us."

Si Stephen Curry midugang og 21 puntos uban ang lima ka tres, siyam ka rebounds, unom ka assists ug tulo ka steals alang sa Warriors nga miwadwad sa klase sa  dinuwaan nga gipangita ni coach coach Steve Kerr.

Si Russell Westbrook nalimitahan ngadto sa 15 puntos, 12 ka rebounds ug pito ka assists sa Thunder, nga wala makaabot og 100 puntos sa labing unang higayon sa miagi nilang lima ka duwa.

Ang maanindot nga layup ni Durant gikan sa pasa ni Curry sa nahibilin nga 3:06 sa ikatulong kuwarter maoy nakapalabaw sa Warriors  sa hingpit, 75-66.

Kabahin kadto sa gipabuto nga 37-11 run sa Warriors apil na ang 30 puntos sa katapusang  8:48 sa ikatulong kuwarter human si Zaza Pachulia misud aron pulihan si JaVale McGee.

Nindot sab ang depensa sa Warriors hinungdan nga ilang nalimitahan si Paul George ngadto sa singko puntos.  Si George nakapasud lamang og usa sa 14 niya ka itsa,  layo ra kaayo sa gikadlit niyang 38 puntos sa dihang ilang gipaksit ang Warriors, 125-105, sa miagi nilang engkuwentro niadtong Pebrero 6.

"He's played at such a high level offensively for such a long time, a night like tonight's going to happen," pasabot pa ni OKC coach Billy Donovan sa pagkabugnaw ni George.

Ang Golden State gilubong sab og 17 puntos sa Thunder niadtong Nobiyembre 22.

Si Draymond Green mitapos uban ang 10  puntos, walo ka assists ug lima ka rebounds apan natawgan sa ika-15 niyang technical karong season sa nahibilin nga 1:04 sa first half. (BANAT NEWS)