‘Ahas’ kapaakon na ni Reveco

CEBU, Philippines — Nagkita na sila si three-division world champion Donnie ‘Ahas’ Nietes ug  Juan Carlos Reveco sa labing unang higayon kagahapon ug ang ALA Gym star wa’y kurat nga mipadayag sa iyang kaandam nga ‘mopaak’ sa iyang Argentine challenger.

Ang 35-anyos nga si Nietes (40-1-4, 22KOs) modepensa sa iyang IBF flyweight title sa labing unang higayon batok ni Reveco (39-3, 19KOs) sa “Superfly 2” card nga ipasalida live sa HBO karong Sabado sa gabii (Domingo dinhi sa Pilipinas) didto sa The Forum sa Inglewood, California.

“I waited so long for this opportunity. Just watch the fight and see how the snake strikes,” matud pa ni Nietes atol sa final press conference didto sa Westin Hotel sa Los Angeles segun sa taho ni Ed de la Vega sa philboxing.com.

Ang garbo sa Murcia, Negros Occidental sa sayo pa nagkanayon nga mopokus lang gyud siya sa away, apan dili siya magpanuko pagtumba kun hatagan og higayon. 

Sa iyang bahin, gikalipay og dako ni Reveco ang tsansa nga maharong ang usa sa labing maayong boksidor sa flyweight division.

Ang sangka nilang Nietes ug Reveco maoy moabli sa HBO telecast sa “Superfly 2” triple-header nga gibitoonan ni Thai Srisaket Sor Rungvisai (43-4-1, 39KOs) nga manalipod sa iyang trono isip WBC super flyweight champion batok sa kanhi kampiyon ug mandatory challenger nga si Juan Francisco Estrada (36-2, 25KOs).

Ang kababayan ni Nietes nga si four-time world champion Brian ‘The Hawaiian Punch’ Viloria (38-5, 22KOs) moaway sab sa maong card ug iyang hagiton ang wa’y pildeng No. 1 contender nga si Artem Dalakian sa Ukraine (15-0, 11KOs) alang sa bakanteng WBA flyweight title.