Pacquiao mihagit sab ni McGregor
CEBU, Philippines — Si Pinoy ring star Manny Pacquiao daw sa nagparamdam sa iyang tinguha nga makig-boksing ni UFC star Conor McGregor sunod tuig.
Kini human ang bugtong eight-division world champion sa kasaysayan mitagik og mensahe sa iyang social media account nga dunay buot ipasabot.
“Happy Thanksgiving! Stay fit my friend. #realboxingmatch #2018 @thenotoriousmma,” post pa ni Pacquiao sa Twitter ug Instagram nga daw sa milabtik og hagit ni McGregor.
Si Pacquiao maoy ikaduhang boksidor karong bulana nga mihagit ni McGregor.
Sa miaging semana, si Oscar De la Hoya mipadayag nga andam siyang mogawas gikan sa pagkaretirado kun ugaling makigsangka kaniya si McGregor. Mibahad pa gani ang kanhi ‘Golden Boy’ nga iyang paundangon si McGregor sulod lamang sa duha ka hugna.
Si McGregor nakaaway og boksing sa labing unang higayon batok ni Floyd Mayweather Jr. niadtong Agosto didto sa Las Vegas.
Ang maong away nga giulohan og “The Biggest Fight in Combat Sports History” milanat lamang og siyam ka hugna pabor ni Mayweather nga impresibong midominar ni McGregor.
Samtang si Pacquiao nahuboan sa iyang bakus isip WBO welterweight champion ni Jeff Horn niadtong Hulyo 2 ug wala na makaaway pa sukad niadto. (BANAT NEWS)
- Latest
