Convergys grandslam gyud!
CEBU, Philippines — Ang Convergys Converters nagsandig sa milagrosong itsa ni Admir Batiancila nga nakapilde sa Teleperformance All-Stars, 58-57 sa tagakay nga duwa sa ilang best-of-three finals series aron pagdaog sa makasaysayanong grandslam sa Elite Classic sa Tanduay Athletics CSCC E-Leagues for Basketball Season 13 niadtong Sabado didto sa City Sports Club-Cebu gym.
Human si Rahne Laborte mikumpleto sa iyang 3-point play aron pagpalabaw sa Teleperformance, 57-56 sa nahibiling 3.4 segundos sa duwa, ang Converters dali nga mitawag og time-out aron makaplastada sa katapusan nilang ataki.
Sa labing krusyal nga bahin sa duwa, si Jeyson Goden ang mi-inbound ug mihatag sa bola ngadto ni Jaime Pacquiao nga mipasa sab dayon ni Batiancila.
Nasayod sa oras nga nahibilin, si Batiancila mitira gilayon inubanan ang pag-ampo. Ang bola mihawok una sa bildo sa wala pa kini misulod sa ring nga nakapadaog sa Converters.
Miduso hinuon og protesta ang Teleperformance kay alang kanila wala dayon makasugod og pitik ang oras sa timer hinungdan nga ang Convergys nakahimo sa maong play sobra sa 3.4 segundos.
Bisan pa man niini, ang Convergys pormal nga gideklarang kampiyon ug maoy nahimo nga labing unang team nga nakasakmit sa Elite Classic title sulod sa tulo ka sunod-sunod nga tuig.
Si Batiancila mitapos uban ang 10 puntos, apan ang iyang itsa nga seguradong dili niya mahikalimtan sa tibuok niyang kinabuhi maoy nakasalbar sa Converters.
Nakakuha sab og atensiyon si Sherwin Emmanuelle Resilla nga mipabuhagay og 20 puntos hinungdan nga mao kini ang gibayaw nga Finals MVP.
Si Marcos Jungoy III maoy nangulo sa All-Stars uban ang 14 puntos, samtang sila si Laborte ug Xavier Dico nagkumboya’g 22 puntos sa pilderong kawsa. (BANAT NEWS)
- Latest
