Cargo Movers makigtakus na’s CESAFI All-Stars karong hapon
CEBU, Philippines — Ang mga Sugboanong volleyball fans makasaksi na sab og talagsaon ug kulbahinam nga aksiyon gumikan kay ang F2 Logistics Cargo Movers makigtakus sa Cebu Schools Athletic Foundation, Inc. (CESAFI) All-Star selection sa duha ka adlaw nga exhibition games sugod karong adlawa diha sa University of San Carlos (USC) main gym.
Sugdan ang hinampakay sa bola sa alas-5:30 sa hapon.
Ubos sa pagtimon ni De La Salle University head coach ug 10-time UAAP women’s volleyball champion Ramil De Jesus, ang Cargo Movers gilangkuban og mga magduduwa gikan sa nagkadaiyang henerasyon sa DLSU Lady Spikers ubos sa pagpangulo ni team captain Cha Cruz uban nilang National Team frontrunners Aby Marano, Kim Fajardo, Kianna Dy ug Dawn Macandili.
Mipalig-on og samot sa ilang line-up mao sila si UAAP 75 MVP Ara Galang, UAAP 79 MVP Majoy Baron ug UAAP 79 Finals MVP Desiree Cheng, Tin Tiamson, Aduke Ogunsanya, CJ Saga, Cherry Nunag, Fritz Gallenero ug Shawna Lei Santos.
Seryoso nga atubangon sa Cargo Movers ang hagit gikan sa mga bitoon sa CESAFI gumikan kay ang ilang pagpanulong dinhi kabahin man sab sa ilang preparasyon sa Grand Prix Conference sa Philippine Super Liga (PSL) sunod bulan.
Bisan og sila inilog kaayo, ang Cargo Movers dili angayan nga mokompiyansa sa CESAFI selection ubos ni coach Grace Antigua, usa ka three-time Southeast Asian (SEA) Games gold medalist ug Cebu Sports Hall of Famer.
Gibunlot ni Antigua gikan sa iyang team sa University of San Jose-Recoletos (USJ-R) sila si Jackie Singson, Daniella Alfeche, Paula Maninang, Linlyn Torado ug Sheen Durango aron modala sa bandila sa CESAFI uban nilang Debbie Gamboa, Marie Malagar ug Cris Jezza Estose sa USC ug Therese Ramas, Dij Rodriguez, Janelle Cabahug ug Dyan Darantinao sa Southwestern University-Phinma (SWU).
Mokompleto sa CESAFI line-up mao sila si Jan Gayo ug Cristylyn Seludo sa University of Southern Philippines Foundation (USPF) ug Christer Claro ug Ellen Joy Gumandoy sa University of Cebu (UC). (BANAT NEWS)
- Latest
