Line-up sa Gilas Pilipinas mausab

CEBU, Philippines - Nagselebrar man tuod ang Gilas Pilipinas   sa  ilang   kadaugan  human nila masakmit ang 2017 SEABA Championship title,  apan  adunay nagpaabot nga  pipila ka suliran ug angay hapsayon  ilabi na sa mga players nga moduwa sa FIBA Asia World Cup qualifiers.

Ang Gilas misakmit sa luna sa FIBA Asia World Cup qualifiers  sa Lebanon karong Agosto   human nila giharos ang tanan nilang kontra sa SEABA. Pero si Gilas coach Chot Reyes nagkanayon nga posible nga adunay mailisan sa 12 ka mga players sa national team.

Kini kay ang FIBA miusab na sa format sa ilang mga torneyo diin himuon na nga home-and-away ang kompetisyon.

Tungod niini, apektado unya sa FIBA Asia World Cup qualifiers ang iskedyul sa mga duwa sa PBA ug maglisud sila  paghangyo sa mga PBA teams aron  huwaman ilang mga sinaligan nga player og taas nga panahon.

Bugtong ang mga PBA rookies nga sakop sa Gilas cadets ang mamahimong birahon sa Samahang Basketbol ng Pilipinas bisan kanus-a kun adunay torneyo ug wala’y labot ang mga sinaligang PBA stars sama nila ni June Mar Fajardo, Jayson Castro, Terrence Romeo, Japeth Aguilar ug Calvin Abueva. (BANAT NEWS)