Warriors misilhig sa Jazz, sud na sa West Finals
CEBU, Philippines - Sa ikatulong sunod-sunod nga season, ang Golden State Warriors miabante na sab sa NBA Western Conference finals human nila gisilhig ang Utah Jazz, kagahapon didto sa Delta Center sa Salt Lake City, Utah.
Si Stephen Curry mipabuhagay og 30 puntos aron pangulohan ang ataki sa Warriors ug ingon
man pagsilyo sa ilang 4-0 sweep sa Jazz.
Sunod nga sangkaon sa Warriors ang modaog sa serye tali sa San Antonio Spurs ug Houston Rockets nga kasamtangang nagtabla, 2-2.
Sa unang kuwarter pa lamang sa duwa, gibombahan na dayon sa Warriors ang Jazz og 39 puntos aron pagposte nila og double-digit nga labaw.
“Guys really came out focused,” matud pa ni Draymond Green nga mikadlit og ‘triple-double’ uban sa iyang 17 puntos, 10 ka rebounds ug 11 ka assists. “We knew what the game plan was and executed that game plan. I think the most important thing, though, is we imposed our will on the game. We had the game at our pace.”
Ang Jazz igong lamang mipaduol ngadto sa otso puntos atol sa halftime, 52-60 gumikan kay ang Warriors miarangkada na usab aron pag-inat og balik sa ilang labaw ngadto na sa 14 puntos human sa tulo ka kuwarter, 93-79
Gawas nilang Curry ug Green, misalida sab silang Klay Thompson ug Kevin Durant. Si Thompson miayag og 21 puntos ug si Durant mihipos og 11 sa balanse kaayo nilang ataki.
Si Gordon Hayward miiskor og 25, samtang sila si Shelvin Mack ug Dante Exum nagkumboya’g 33 puntos sa nanamilit na nga Jazz. (BANAT NEWS)
- Latest
