Nietes gusto pa mohimo’g kasaysayan
CEBU, Philippines - Naila na siya karon isip longest reigning Filipino world boxing champion, apan si Donnie ‘Ahas’ Nietes gusto pang mokulit og laing kasaysayan aron pagpagilak og maayo sa mabulukon na niyang karera.
Kini mao ang mamahimong ikatulo nga Pinoy’ng boksidor nga mobira og tulo ka world titles o sobra pa sa managlahing weight divisions, dungog nga sila pa lamang si Manny Pacquiao ug Nonito Donaire Jr. maoy nakaangkon.
Mao kana ang tirada ni Nietes sa dihang iyang sangkaon si Thai Komgrich Nantapech alang sa IBF flyweight championship sa main event sa Pinoy Pride 40 karong Abril 29 diha sa Waterfront Cebu City Hotel and Casino.
Sa iyang flyweight debut niadtong Septiyembre sa miaging tuig didto sa Amerika, si Nietes mihimo dayon og impresiyon sa dihang yano niyang gipilde ang kanhi Mexican world champion nga si Edgar Sosa.
Mao kini ang nakapadasig ni Nietes nga gibati nga siya nagkakusog bisan og misaka og timbang.
Matud sa garbo sa Murcia, Negros Occidental nga komportabli kaayo siya sa bag-o niyang dibisyon ug duna pa siya’y daghan nga gustong buhaton sa dili pa maghuna-huna nga moretiro.
Nag-una sa iyang misyon mao ang paghiusa sa mga titulo ubos sa flyweight class. Sayod si Nietes nga dili sayon ang maong tahas apan determinado siya nga iyaha kining makab-ot.
Gusto ni Nietes nga hagiton ang labing maayong boksidor sa iyang dibisyon ug iyang seguraduon nga duna siya’y ikabilin nga legasiya ug handumanan sa mga fans sa higayon nga moabot ang panahon nga siya makahukom na nga mobiya na sa boksing.
“I want to challenge the best fighters out there”, hagit ni Nietes. “I’ve so much more to show all the boxing fans and supporters. I want to inspire young fighters who have big dreams too, and when I do retire, I want to be someone who’s made my country and my people proud.” (BANAT NEWS)
- Latest
