Monterroyo/Co-jordan 2-0 na, RMB daog sab

CEBU, Philippines - Nasegundaan ang daog sa Monterroyo/Co-Jordan pinaagi sa pagpilde sa Solita-Tabok, 57-45 sa LABA Commissioner’s Cup 2017 basketball tournament niadtong Lunes didto sa Co Tiao King gym sa Tabok, Mandaue City.

Sa sayo pa, ang New Millennium Hardware midaog pinaagi sa “forfeiture” batok sa Luke Genesis.

Ang New Millennium Hardware ni team owner Gil Gollon temporaryo karon nag-una sa standing uban sa ilang 3-0 win-loss record ning maong liga nga namugna pinaagi sa paningkamot sa presidente niining si Gilbert Sebandal.

Naglisud ang Monterroyo/Co-Jordan sa nag-unang duha ka kuwarter ug igo lang sila nilabaw og sayes puntos sa halftime, 28-22. Pag-entra sa third period miarangkada ang Monterroyo/Co-Jordan hinungdan nga wala na maitsura ang duwa sa Solita-Tabok  nga wala makalahutay sa higpit nga duwa.

Walay nakaiskor og double figures sa Monterroyo/Co-Jordan, apan balanse ang ilang opensa diin 13 ka players ang nakapuntos pinangulohan ni Dr. Raul Monterroyo sa iyang otso puntos.

Ang Monterroyo/Co-Jordan nilang Dr. Monterroyo ug Richard Jordan ikaduha karon sa standing sa ilang 2-0 record.

Sila si Rosas ug Gilbert Diano nagkumboya’g 17 puntos sa napildeng Solita-Tabok nga wa pa’y daog sa duha ka duwa.

Sa laing aksiyon, ang RMB  nidominar sa tibuok duwa aron pagpukan sa Team Velasco ni Jennifer Velasco, 60-51.

Ang RMB ni playing coach Tony Alcover nagbitbit na karon og 1-1 nga baraha, samtang ang team Velasco  adunay 0-2 record.

Labaw og otso puntos ang RMB  ni Romeo M. Baladjay sa first period, apan  nahulga kini dihang misikit ang team Velasco ni Jennifer Velasco, 27-25 paghuman sa unang duha ka kuwarter. Dali hinuon nakainat sa ilang labaw ang RMB ug ila kining naprotektahan hangtod nahurot ang oras sa duwa.

Ang mga duwa gidumala ni league commissioner Albert ‘Obeth’  Ramos sa abag ni Rudy Candelada, usa sa mga founder sa LABA.

Puntos matag usa

Unang duwa:

RMB (60) – Diaz 13, Canas 9, Recto 8, Alibo 6, Cane 6, Bukiron 3, Rogado 3, Migallen 2, Anghay 2, Lagaras 2, Magale 2, Alcover 2.

VELASCO (51) – Bathan 11, Baguio 8, Suson 4, Oquias 4, Molina 4, Pelarios 4, Arreglo 4, Miñoza 4, Yatan 2, Abarquez 2, Velasco 2.

Ikaduhang duwa:

MONTERROYO/CO-JORDAN (57) – Monterroyo 8, Tañan 7, Ramos 6, Ouano 6, Mendoza 6, Cabucos 5, Panugaling 5, Landiza 3, Jordan 3, Tantuan 2, Gastardo 2, Caballero 2, Paciencia 2.

SOLITA-TABOK (45) –  Rosas 9, Diano 8, Pepito 6, Birondo 5, Talledo 4, Abing 4, Hatamosa 4, Marturillas  3, Florentino 2. (BANAT NEWS)