Maliksi nag-'sorry', apan gisilotan gihapon
CEBU, Philippines - Nangayo na og pasaylo si Star Hotshots forward Allein Maliksi human sa iyang pamahayag nga ‘luto’ ang ilang semifinals series batok sa Barangay Ginebra kay gipaboran kini sa mga reperi.
Si Maliksi, kinsa nakit-an sa Game-4 niadtong Lunes nga mihimo og hand-sign nga nagpasabot ‘giluto’ sa reperi ilang duwa maong napilde sila, gipatawag sa opisina ni PBA Commissioner Chito Narvasa aron pangayoan og katin-awan nganong gibuhat kini niya.
Si Maliksi, usa sa mga leading scorer sa Star sa ilang semifinals, miangkon nga nadala ra siya sa emosyon tungod kay gusto gyud niya nga modaog.
Bisan pa sa iyang pagpangayo og pasaylo, wala gihapon makaikyas si Maliksi sa silot, wala pa hinuon matino kun pila ang kantidad apan dili kini moubos sa P10,000.
Gawas ni Maliksi, gisilotan sab iyang teammates nga sila si Marc Pingris ug Jio Jalalon. Si Pingris usa sab sa mga nagsumbingay sa mga reporter nga wala siya kauyon sa mga tawag sa referees, samtang si Jalalon nanapat ngadto ni Ginebra guard Sol Mercado atol sa usa ka init nga play. (BANAT NEWS)
- Latest