Alvarez batok Chavez gitakda sa Mayo 6

CEBU, Philippines - Magsangka na gyud alang sa giatngan nga middleweight showdown tali sa duha ka Mexican boxing stars nga sila si Saul Alvarez ug Julio Cesar Chavez Jr. sa Mayo 6.

Ang maong sangka maoy gihulagway karon nga usa sa mga labing giatngan ug dakung boxing match tali sa duha ka Mexican boxers. Wala pa hinuon matino ang binyu  alang sa maong sangka. Posible adto kini sa Las Vegas o di ba sa Dallas, Texas.

Ang junior middleweight king nga si Alvarez maoy inilog batok ni Chavez, ang kanhi kampiyon sa 160 lbs. division.  Hinuon delikado gihapon si Chavez alang ni Alvarez tungod kay bag-o lang kini midaog sa iyang “comeback fight” didto sa Mexico human sa kapin usa ka tuig nga pagkabakante.

Sa katapusan niyang sangka, si Alvarez mipamatuod nga usa siya sa mga sikat nga boxing stars sa iyang henerasyon dihang 51,240 ka mga fans ang misaksi sa iyang pag-TKO ni Liam Smith alang sa junior middleweight belt.

Si Alvarez adunay 48-1 nga record,  bugtong pilde niya nagagikan ni Floyd Mayweather Jr., samtang ang anak ni boxing legend Julio Cesar Chavez Sr. nga si Chavez Jr.  nagbitbit og rekord nga 50-2, diin 32 niyang daog pinaagi sa   knockout. (BANAT NEWS)