HAGBA na sab
Emmanuel B. Villaruel (Banat) - January 13, 2017 - 12:00am

CEBU, Philippines - Gipaluhod na sab sa Portland TrailBlazers ang defending champion Cleveland Cavaliers ug dili basta-basta ang ilang kadaugan kay gilubong pa kini nila sa iskor 102-86 sa duwa nila sa NBA kagahapon didto sa Rose Garden Arena sa Portland, Oregon.

Si CJ McCollum miratsada og 27 puntos, samtang si Allen Crabbe mitampo og 24 puntos sa Blazers nga midaog sa ikaupat nga sunod-sunod nga regular season games batok sa Cavaliers didto sa Moda Center.

Dominado kaayo sa Portland ang maong duwa diin sila naglabaw og 24 puntos nga nakapaluya sa bisitang Cavs.

Grabe ang pagmangtas ni McCollum kay mipabuhagay kini og 21 puntos sa second half, apil na niini ang iyang 3-pointer nga nakahatag og 85-69 nga labaw sa Blazers sa nahabilin nga nuybe minutos sa duwa.

Mao kadto ang ikapitong sagunsong duwa nga si McCollum miiskor og dili mominus sa 25 puntos.

Wala kasalida og maayo si LeBron James nga dunay 20 puntos ug 11 ka rebounds sa Cavs nga napilde sa ika-10 pa lamang nga higayon karon nga season. Ang Cavs nga nahagba batok sa Utah Jazz, 100-92  niadtong Miyerkules, nakatilaw sa labing una nilang sunod-sunod nga pilde karon nga season.

Didto sa Oklahoma City, si Russell Westbrook mitala sa ika-18 niyang triple-double karon nga season nga naghatod sa Thunder ngadto sa 103-95 nga kadaugan batok sa Memphis Grizzlies.

Si Westbrook mipasud lamang og unom sa 19 niya ka itsa ug sipyat ang unom ka gibuhian niyang tres, apan mihipos gihapon kini og 24 puntos, 13 ka rebounds ug 12 ka assists alang sa ika-55 nga triple-double sa iyang karera.

Dili lamang manindot nga numero ang iyang gitunol gumikan kay 33-3 ang Thunder sa miaging season ug 15-3 na karong tuiga sa higayon nga siya mokadlit og triple-double.

Sila si Enes Kanter ug Victor Oladipo nagkumboya’g 35 puntos sa Thunder nga mitali sa ikatulo nilang sagunson nga daog ug ingon man nakabawos sa Grizzlies nga mipatilaw sa labing pait nilang pilde karon nga season sa iskor nga 80-114 niadtong Disyembre 29.

Sa lain pang mga duwa, ang Minnesota Timberwolves mipahagsa sa Houston Rockets, 119-105,  ang  Philadelphia 76ers  mipakugang  sa New York  Knicks sa iskor nga 98-97, ang Los Angeles Clippers misanta sa Orlando Magic, 105-96 ug ang Boston Celtics mipakaging sa Washington Wizards sa iskor nga 117-108. (BANAT NEWS)

HAGBA
Philstar
Facebook
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with