SJA nimasaker sa SPCFI sa MACABA

CEBU, Philippines - Ang St. Joseph’s Academy wa’y kaluoy nga nimasaker sa St. Paul College Foundation, Inc.-Ramos Campus, 98-31  pagsugod sa  19th Mandaue City Amateur Basketball Association (MACABA) season niadtong weekend didto sa Ibabao gym.

Si Robert John Tan milansang og pito ka 3-pointers sa iyang 25 puntos sa SJA nga dominante kaayong puwersa human sayong nakalabaw, 25-10. Nahukman na ang resulta sa duwa sa halftime pa lang daan human miposte og 34 puntos ang SJA sa iskor nga 52-18.

Padayong nanginit ang SJA sa nahabiling bahin sa duwa dayon na ngadto sa paglubong og 67 puntos sa nagkagidlay nga SPCFI.

Sa laing bahin, andam na ang tanan alang sa La Purisima Concepcion Fiesta Open Basketball Tournament nga mosikad   ugmang adlawa sa Barangay Umapad, Mandaue City.

Ang makampiyon sa maong lima ka adlaw nga torneyo nga gipaluyohan ni kanhi Brgy. Capt. Zaldy Lumapas, konsehal  Libertine Lumapas, kanhi konsehal Ranulfo Alivio ug Lino Alilin modawat og P15,000. Ang motapos sa ikaduhang dapit mobulsa og P10,000, samtang ang ma-3rd ug 4th mobira og P5,000 ug P2,000. (BANAT NEWS)