EJ Fitness gym pabiling wa’y pilde sa Bond of Masters Tournament

CEBU, Philippines - Midaku ang kahigayonan sa EJ Fitness Gym nga moabante sa semifinals human sa ilang 71-63 nga kadaugan batok sa Horizon Auto Parts sa Third Conference  Bond of Masters Basketball Tournament niadtong Martes didto sa Alta Vista gym sa Pardo, Cebu City.

Si Zee Almine maoy labing kuyaw nga nakaduwa alang sa EJ Fitness Gym ug gipangulohan ang kadaugan pinaagi sa iyang 25 puntos.

Ang EJ Fitness Gym pabiling nag-una sa standing bitbit ang 4-0 nga baraha. Si Almine nakakuha sab og maayong suporta gikan nilang Albert Taneo ug Aldrin Abellanosa nga parehong miantog og 16 puntos ug Jovit Abellanosa sa iyang 10 puntos.

Ang Horizon Auto Parts gipangulohan sab ni Ebit Nadela  pinaagi sa iyang 16 puntos. Misalida sab silang Lloyd Sabellano ug Marvin Muñoz nga nagkumboya’g 27 puntos alang sa Horizon Auto Parts nga aduna na karo’y 2-2 record.

Sa laing aksiyon, ang Barbeque Boss mituhog na sab og daog batok sa MJE Inside Edge, 83-72.

Human magtabla sa first quarter, 23-all, ang Barbeque Boss kalit nga miarangkada ug wala na molingi hangtod nahurot ang oras sa duwa.

Si Jayvan Arradaza mihiwa og 18 puntos, samtang si Rusty Cabellon mikalis og 11 puntos alang sa Barbeque Boss. Gipangulohan gihapon ni Panot Villamor ang MJE Inside Edge  sa iyang 23 puntos. Si Erol Ibones mikandos og 15 puntos ug si Victor Pacquiao mihakot og 12 puntos. Ang Barbeque Boss ug MJE Inside Edge  pulos adunay 3-1 nga baraha ug kasamtangang nagsawo sa ikaduhang dapit sa standing ning maong liga nga nahimo sa paningkamot ni Jun ‘Master’ Tan.

Puntos matag usa

Unang duwa:

EJ Fitness Gym (71) – Almine 25, Taneo 16, A. Abellanosa 16, J. Abellanosa 10, Aves 2, Abarquez 2.

Horizon Auto Parts (63) – Nadela 16, Sabellano 14, Muñoz 13, Tabasa 6, Antolijao 6, Zerna 4, Jasmin 4.

Ikaduhang duwa:

Barbeque Boss (83) – Arradaza 18, Cabellon 11, B. Ceniza 9,  Montilla 9, Baculi 6, Montillano 6, Dela Victoria 6, Gabuya 6, Yu 5, Tariga 5, D. Ceniza 2.

MJE Inside Edge (72) – Villamor 23, Ibones 15, Pacquiao 12, Porio 8, Miscala 6, Hinto 4, Mapait 2, Engracial 2. (BANAT NEWS)