Adlaw sa paghukom

CEBU, Philippines - Miabot na ang adlaw aron hingpit na nga mahukman kun makuha na ba sa Alaska Aces ang dugay na nilang gihandum nga Philippine Cup title o masakmit sa San Miguel ang kasaysayan isip labing unang koponan sa PBA nga mokampiyon gikan sa 0-3 nga biya sa serye.

Wala na’y ugma pa alang sa duha ka koponan gumikan kay magsangka sila sa katapusang higayon niini nga conference sa  Game-7 karong gabii didto sa Mall of Asia Arena.

Tuyo ug tumong sa Alaska ni coach Alex Compton nga matambalan ang  kauhaw nila sa All-Filipino Cup  title nga katapusan nilang natilawan niadto pang tuig 2000.

Bisan pa sa katulo ka higayon nga napakyas sila sa pagselyado sa kampiyonato, si Compton hugtanong miingon nga anaa gihapon ang kompiyansa sa iyang mga batos ug positibo siya nga masakmit na nila ang korona.

Si Vic Manuel, kinsa migawas nga labing mahinungdanong player sa Aces sa finals nagkanayon nga gikapoy na sila sa kanunay nga pagpukan kanila sa Beermen sa finals nga nahitabo sa makaduha ka higayon sa miaging season. Ug karong gabii, ilang ipakita nga determinado sila nga mapilde ang San Miguel sa usa ka finals series.

Sa ilang bahin, ang Beermen miduol karon sa usa ka dakung kalampusan sa usa ka basketball franchise ug maoy tuyo nila     mao ang pagdaog sa kampiyonato gikan sa 0-3 nga pagkalubong sa usa ka best-of-seven series.

Si Beermen coach Leo Austria miingon nga tagsa ra moabot ang kahigayonan nga mahimo ang talagsaong kalampusan ug dili sila magpanuko sa pagkab-ot niini.

Gikan sa delikadong sitwasyon diin diriyot sila ma-sweep sa Alaska, kalit karon nga misaka ang kompiyansa sa San Miguel ilabi na usab nga mibalik na og duwa ang reigning MVP ug Cebuano center nga si JuneMar Fajardo.

Pabor karon ang Beermen gumikan kay nailog nila ang momentum gikan sa Aces.

Ang kadaugan sa Beermen mohatag sa ilang ika-22 nga PBA franchise title nga maoy labing daghan sa maong liga, samtang  ang  Aces  padayong nangandoy sa ilang ika-15 nga kampiyonato. (BANAT NEWS)