Lapu-lapu City mopadala’g kapin 300 ka atleta

CEBU, Philippines - Kapin sa 300 ka mga estudyanteng atleta ang ipadala sa Department of Education (DepEd) sa dakbayan sa Lapu-Lapu alang sa Central Visayas Regional Athletic Association (CVIRAA) nga gikatakdang sugdan karong Domingo didto sa Naga City, Cebu.

Mao kini ang gitataw ni Nona Booc, usa sa mga opisyal sa DepEd nga ilaha kini gibuhat kay labot kini sa ilahang curriculum nga mahilambigit sa  paugnat sa kusog.

Matud pa ni Booc, sagad sa mga atleta naggumikan sa mga pampublikong eskwelahan ug  gamay ra niini ang gikan sa pribadong tunghaan tungod kay moagi kini sila og selection process aron maapil sa CVIRAA.

Nagkanayon si Booc nga suportado sa city government ug ni Lapu-Lapu City Mayor Paz Radaza ang mga atleta, diin P2 milyones ang gihatag alang sa pagkaon ug transportasyon, samtang P1.2 milyones ang gihatag nga badyet alang sa mga uniporme niini.

Sa pagsuwat niini, gipaubos og training ang mga estudyante alang sa nagkalain-laing duwa sa indoor ug outdoor games.

Karong Huwebes, ang delegasyon sa dakbayan sa Lapu-Lapu mobiyahe padulong sa Naga. (BANAT NEWS)