Mr. Jabat dili ka namo kalimtan kay imo kaming mga tinudloan

Hilum pa sa Biyernes Santo ang among Domingo kagahapon dihang nakadawat ang among editorial department nga mipanaw na sa laing kalibotan ang among gitahud ug gipangga nga si Mr. Juanito  V.  Jabat sa edad nga 83 anyos. Si Mr. Jabat maoy kanhi Editor-In-Chief sa The Freeman sulod sa dugay nang panahon gikan pa niadtong sayong bahin sa dekada 80.

Usa sa haligi sa The Freeman ug gani matawag siya nga usa sa labing loyal nga editor sa nahisgotang newspaper institution ug ang iyang pagka-matinud-anon ngadto sa pamilyang Gullas ilabi na sa atong Chairman nga si Jose R. Gullas o tawgon namo nga Sir Dodong.

Hapit na lang ako mo-retiro sa The Freeman wala gyud ako hikasab-i ni Mr. Jabat bisan usa ka higayon apan ambot lang kaha kung dili pa sports ang akong gisuwat, wala sab ako makaseguro kung dili ba ako malakip sa iyang kasaba o pagbadlung nga sayop ang among mga hard news o enterprise stories alang sa front page nga among gisuwat. Apan sa pagka-gwatsinanggo, wala na seguro'y makalupig pa ni Mr. Jabat kinsa makapahimuot kaayong ikahinabi ug ang iyang pagka mahiligon sa komedya, makita sa iyang lindog nga "Have Bat, Will Strike." Kay Jabat lagi, iya kining gihimong "have bat" unya gisumpayan og "will strike" kay motikdol man sab siya niadtong mga politiko nga angayan sawayon.

Di ba sa natad sa baseball o softball ang dunay bat  maoy mohapak?

Usa sa akong dili gyud malimtan nga gipamulong ni Mr. Jabat nga hangtod karon mahikatawa gihapon akong maghuna-huna dihang anibersaryo kadto sa The Freeman ug gihangyo siya nga pasultihon og gamay o bisan mubo lang tungod lagi kay siya man maoy dako'g ranggo.

Didto kini mahitabo sa Marriott Hotel ug matod pa niya human sa introduction "I like the position but I hate the job."

Matag adlaw niyang natawhan kung dunay mga kaila nga mo-greet kaniya, iya gyud kining baslan og komedya. Matag ingon ni Mr. Jabat nga mobasa siya sa Sportsgab, daw bayawon ako gikan sa yuta bisan pa og ibutang lang nato nga usa kini ka ulog-ulog apan isip among labaw, lahi ang among bation nga kalipay.

Mao lang una kini ang atong impormasyon nga ikahatag kalabot sa kamatayon sa among tinahud nga Mr. Nito Jabat. (Basaha lang ninyo palihug ang kumpletong detalye sa news page sa The Freeman ug Banat News)

Masulob-on ang among semana sa natad sa sports dinhi sa Sugbo dihang mipanaw na ang among higala nga kanhi manager sa Cebu Coliseum nga si Ben Tulda. Dugay na nga panahon nga wala kami makakita sa hilabihan ka-estoryador nga si Sir Ben.

Usa sa iyang anak nga si Lolot Tulda maoy nahimo nakong suod nga higala kay komendyante sab kaayo.

Didto ako mahibawo sa kamatayon ni Sir Ben sa FB post ni Engr. Ariel Araw-araw nga ako sab higala kinsang maguwang maoy asawa ni Lolot.

Karong Sabado, Oktubre 24 ilubong si Sir Ben samtang matag gabii ang vigil diha sa St. Peter's funeral homes sa dan Imus.

Dili pa lang dugay, masulob-ong taho ang misugat sa Cebu Schools Athletic Foundation, Inc. (CESAFI) finals tali sa University of the Visayas Green Lancers batok sa University of San Carlos Warriors dihang among hisayran ang kamatayon ni Erning Remedio, ang kanhi assistant coach sa University of Southern Philippines-Foundation.

Dili kay kana lang, nakurat sab kami sa kamatayon sa batan-ong beauty queen nga si Alexis Rizzini Gomez, ang kanhi Miss CESAFI ug Aliwan queen. Si Rizzi, anak ni kanhi University of  Cebu Webmasters coach Roel Gomez ug ni Lalaine Gomez nga usa ka nurse didto sa New York City.

Ang 25 anyos nga si Rizzi gilubong na kagahapon ug mangayo ako'g pasaylo kang coach Roel tungod kay wala gyud ako makaduaw didto sa haya ni Rizzi sa St. Peter's Mandaue.

Kanilang tanan nga mipanaw, ato silang i-ampo.

MISCELLANEOUS. I was beside former Cebu City Mayor Alvin Garcia   when he was singing an old favorite love song yesterday at the Wetland Resort along Tagunol street owned by Engr. Joselito Rodin. It was also host of two-year-old Safia Kate Narvasa's birthday and a children's party was held there. Safia is the daughter of Leslie Narvasa, the niece of my wife Gingging. Thanks for the snacks Danica Canitoy and Kenji Izumi, my pals from CESAFI.