Volleyball mosikad sa ubang events sa CESAFI karon

CEBU, Philippines - Ang  volleyball tournament maoy pormal nga mosikad sa uban nga events sa 15th Cebu Schools Athletic Foundation, Inc. season karong adlawa diha sa University of San Jose-Recoletos (USJ-R) Basak campus gym.

Ang mga duwa ubos sa secondary division maoy unang kumbatihan diin ang girls defending champion University of San Carlos makigtige batok sa Southwestern University sa ala-1 sa hapon. Sundan dayon kini sa engkuwentro tali sa Sacred Heart School-Ateneo de Cebu ug Cebu Eastern College.

Sa boys class, ang USJ-R makigharong batok sa Don Bosco Technology Center, samtang ang defending champion USC mohamag batok sa University of Southern Philippines Foundation.

Ang semifinal round gikatakda karong Agosto 29 dungan sa pagsugod sa aksiyon sa college division.

Ang beach volleyball subhan dayon human sa indoor volleyball finals karong Oktubre 11. Ang football ug athletics magsugod karong Sabado diha sa Cebu City Sports Center ingon man ang karatedo didto sa USJ-R Basak ug taekwondo sa Pacific Mall sa dakbayan sa Mandaue.

Ang badminton sugdan sa Agosto 29 didto sa MetroSports sa Lahug, ang chess sa  Sept. 5-6 sa USJ-R Basak, ang dancesport sa Sept.19  sa Waterfront-Cebu City Hotel and Casino, ang tennis sa Citigreen ug table tennis sa SHS-AdC karong Sept. 5, ang swimming karong Sept. 3 sa CCSC ug ang scrabble sa Sept. 19 sa University of the Visayas (UV) main campus.  (BANAT PALARO)