Taga FIBA racista
Sports Gab - Gabby G. Malagar (Banat) - February 2, 2015 - 12:00am

Taudtaud akong nagpakahilum. Pebrero 2 na karon ug gikan niadtong Enero 19,2015 wala ako mo-react  sa usa ka email nga gipadala kanako ni Graham C. Lim, ang secretary-general sa Basketball Association of the Philippines kon BAP.

Matod pa ni Lim nga kining secretary-general sa FIBA (Federation de Internationale Basketball Association) nga si Patrick Baumann usa ka oppressor o tyrant nga sa ato pa usa ka madaog-daugon nga pagkatawo.

Nakaila ako kang Lim ug wala ako'y nailhan sa FIBA busa adto ako motuo ni Lim.

Diha na unta'y higayon nga makaila gyud ako sa personal aning mga opisyales sa FIBA apan kaming duha sa camerman sa TV5 nga si Kapatid Eding gihimo nilang kiko-kiko ug otro sab nilang mga taga Gilas nga sa ilang pagka-langaw nga nakatungtong sa ibabaw (buko-buko) sa kabaw, mura na sab sila'g kabaw.

Sa dili pa nako isugid ang pagka-kwanggol aning taga FIBA, ako unang hisgotan ang artikulo ni Lim nga nag-ingon nga ang pagka-suspenso sa Japan sa FIBA nagpakita sa pagka-oppressive ni Baumann. Ang rason ni Baumann kay kuno kuwang sa panglantaw ang Japan sa pagsulbad sa usa ka yanong suliran alang sa kalamboan sa basketball sa ilang nasud.

Insulto kuno kini sa mga Hapon matod pa ni Lim kay dili na maihap sa tudlo kung kapila na mo-host ang Japan og international basketball. Ambot nganong wala man intawon ni ma-apil sa baha sa Yolanda si Baumann uy.

Basin nag-comatose kini si Baumann dihang mi-host ang Japan sa FIBA World Cup ug karong umaabot 2020 Olympics, ang Japan maoy mo-host. Kung naa may usa sa superpower sa basketball sa Asia karong panahona, kana mao ang Japan. Ang Japanese women's national team maoy usa sa labing maayo sa tibuok Asia.

Ang gusto gyud diay ni Baumann nga kung mahimo, usa lang ka international tournament ang himoon aron siya ra mao magkontrolar niini ug kini mao ang FIBA wala nay lain pa.

Duha ka higayon nga iyang gisuspenso sa FIBA ang Pilipinas ug wala na niya suporta-e ang BAP kay didto na isya makapusta sa Samahang Basketball ng Pilipinas. Mao ra nga grupoha gitinagalog lang ang BAP. Tsk, tsk, tsk.

Ambot makahimo pa kaha si Baumann pagsuspenso sa USA Basketball di ba kaha siya assassinate-ton.

Mobalik kita niadtong nahitabo namo ni Eding sa among pagsugat sa FIBA officials diin naghimo sila'g site visit ug ocular inspection sa SM Seaside City-SRP diin adunay tukoron nga basketball court nga gitawag og "The Arena" nga posibleng maoy himoong venue sa umaabot 2019 FIBA World Cup dinhi sa Pilipinas. Kini diay'ng taga FIBA dunay gitawag nga "Three Stooges" nga silang Baumann, Boris Stankovis ug Bob Elphinston. Bisan asa ato nila wala gyud tawon kami makahigayon og ila-ila kay matod pa sa usa ka insik nga nagtinagalog "Okay na kami. Bawal magtanong." Otro sab tong Tagalog nga nagsul-ob og t-shirt nga Gilas blue wala gyud mo-ingon sa mga langyaw nga "can we just give TV5 a chance?" Kamaayo rang ipa-futbol ni MVP atong tawhana oi. Wala seguro siya kahibaw ang tag-iya sa Gilas ug TV5 usa ra. Basin sweldo ray gihapon atong tontoha. Sus taga Mambaling raba ko duol sa SM, ambot lang unsay akong buhaton sunod kung ila ming insultohon. Basin akong isulod og sako unya ipalutaw sa SRP.

Nagtinutokay mi ni Eding kun unsay among buhaton gawas pa nga pwerteng inita didto sa SRP wala gyud tawon mopa-consuelo nga kuyog lang mo namo maniudto.

Ang labing laktud pagkasulti, wala gyud kami masayud kung pila ka por siyento nga aprubahan sa FIBA ang Cebu hosting sa World Cup.  Pero labot man ni sa amung trabaho sige na lang. Mag-usab pa'y layug.

AMBOT BASKETBALL BAUMANN FIBA PILIPINAS USA WALA WORLD CUP
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with