Knicks sugamak sa ika-16 ka sunod-sunod nga duwa

CEBU, Philippines - Ang Milwaukee Bucks yano kaayong milubong sa nagsangkiig nga New York Knicks, 95-79 sa nagpadayong duwa sa National Basketball Association kagahapon didto sa O2 Arena sa London, England.

Nangu sa kadaugan mao si O.J. Mayo, kinsa mipabuto’g 22 puntos, gisundan ni Brandon Knight sa iyang 20 puntos uban ang unom ka steals.

Milanat na ngadto sa franchise record nga 16 ka pilde ang Knicks, kinsa mao na karon ang naghupot sa labing ngil-ad nga rekord sa NBA sa ilang 5-36 nga baraha.

Gipakita na sab sa Knicks ang matang sa ngil-ad nga duwa nga maoy hinungdan nga napilde na sila’g 26 sa ilang 27 ka duwa. Ang maong sangka dili maayong advertisement alang sa NBA nga mopahigayon na og tinuig nga duwa overseas.

Ang Knicks misipyat sa unang 10 nila ka tirada ug  mihatag og 14 ka offensive rebounds, 10 niini didto sa first half.

Gisugdan sa Bucks ang duwa pinaagi sa 14-0 lead sa wala pa sila molabaw og  24 puntos didto sa second quarter. Namintinar sa Bucks ang double digits nilang labaw sa kinatibuk-ang duwa.

Bisan sa pagbalik ni Carmelo Anthony, wala gihapon makasungasong ang Knicks ug wala sab makahugyo og maayo si Amare Stoudemire.

Si Anthony maoy nangu sa Knicks nga miiskor og 25 puntos, apan si Stoudemire wala makapuntos sud sa otso minutos sa first half.  Wala na siya moduwa human sa halftime break.  Si  Anthony wala na sab makaduwa tungod sa piang sa tuhod. Si Stoudemire taud-taud na sab nga wala makaduwa sukad pa niadtong Disyembre 25 tungod gihapon sa knee injury.

Ang laing mga players sa Bucks nga nakahimo’g double figures mao silang Giannis Antetokoumpo pinaagi sa iyang  16 puntos, gisundan ni Khris Middleton nga adunay 14 puntos ug Zaza Pachulia nga miamot og 11.

Sa laing mga duwa,  ang Houston Rockets  mipilde sa Oklahoma City Thunder sa iskor nga 112-101 didto sa Chesapeake Arena sa Oklahoma City,  ang Cleveland Cavaliers midaog sab batok sa Los Angeles Lakers, 109-102 didto sa Staples Center sa Los Angeles, California.