UV Baby lancers buhi pa
CEBU, Philippines - Buhi pa ang paglaum sa University of the Visayas (UV) Baby Lancers nga mosakmit sa korona dihang mibawos kini ngadto sa Sacred Heart School-Ateneo de Cebu (SHS-AdC) Magis Eagles, 59-56 sa Game-2 sa ilang “best-of-three” finals series sa juniors division sa 14th Cebu Schools Athletic Foundation Inc. (CESAFI) basketball event kagabii diha sa Cebu Coliseum.
Gumikan niini, nasumpo sa Baby Lancers ang tulo ka higayon nga pagdominar kanila sa Magis Eagles.
Nasumpo sa Baby Lancers ang tulo ka higayon nga pagdominar kanila sa Magis Eagles aron makapugos og knockout game ugma sa alas-2 sa hapon diha sa Cebu Coliseum.
Giusikan sa Baby Lancers ang ilang 10 puntos nga labaw, 31-21 sa uwahing bahin sa second period, apan bisa’g gibaslan sila sa Magis Eagles og five-point swing, sila lang gihapon maoy naglabaw atol sa halftime, 31-26.
Nagpakita sa iyang katakus ang beterano nga si John Carl Escalona, kinsa migamit sa iyang kasinatian isip team captain tungod kay usa siya sa naghatag og kinabuhi sa opensa ug depensa sa ilang team.
Si Escalona mibugha’g 19 aron pangulohan ang Baby Lancers, samtang si Theo Joshua Flores miamot og 17 puntos ug si Orlan Wamar mitampo’g 15 puntos.
Biya pa unta ang Baby Lancers og kuwatro puntos sa katapusang dos minutos, apan mihimo sila’g sagunsong singko puntos diin ang lay-up ni Wamar maoy naghatag kanila pagbalik sa labaw, 57-56 sa nahabiling 1:02 sa duwa.
Usa ka maayong depensa ang gihimo sa UV batok kang Janjan Jaboneta hinungdan nga nabuhian niya ang bola ug sa ilang ball possession, gipadagan pa ni Escalona ang oras dayong hatag ngadto kang Wamar sa katapusang 52 segundos. Nakakubi pa og foul si Wamar gikan kang Jeremy Nacua nga maoy naghatod kaniya ngadto sa free-throw line. Iyang napasulod ang duha ka free throws alang sa 59-56 nga labaw .
Suwayan pa unta nilang Jose Piero Dominic Longa ug Nino Araw-araw nga ihatud ang duwa ngadto sa overtime, apan pareho silang misipyat sa ilang three-point attempts. Palpak sab ang undergoal stab ni Joseph Mayol dayong tingog sa final buzzer.
Walay bisan usa ka player sa Magis Eagles nga nakahimo’g double figures bisan pa man tuod og mas balanse ang ilang scoring. (BANAT PALARO)
- Latest