CCF, NISSI mipukan sa ilang karibal sa FCA cagefest

CEBU, Philippines -  Gipanglubong sa defending champion CCF ni coach Albert Alocillo ug sa NISSI Jr. Ballers ang tagsa-tagsa nilang karibal sa 34th 34-under division sa 4th Fellowship of Christian Athletes (FCA) basketball tournament didto sa karaang gym sa Sacred Heart School-Ateneo de Cebu sa General Maxilom Avenue, dakbayan sa Sugbu.

 Ang CCF milusad og makalisang nga pangataki sa hinapos nga bahin sa duwa aron  mabuntog ang ACES, 55-40, samtang ang NISSI  yano sab kaayo milansang og daog dihang  gikontrolar nila ang kinatibuk-ang duwa batok sa Cross Pointe All-Stars, 53-31.

 Nabiyaan og singko puntos ang CCF human sa tulo ka kuwarter, 26-31, apan mipabuto  sila’g makabungog nga 29-9 run  sa final period aron mapusoy ang Aces.

 Sila si Aldriane ug Kareem Alocillo nagkumboya og 22 puntos alang sa CCF. Si Jaycess mao lang ang bugtong player sa ACES nga miiskor og double figures sa iyang 10 puntos.

 Sa laing bahin, walay usa ka player sa NISSI ang mihimo’g double digits, apan ang ilang balanseng opensiba igo na kaayo pagpulbos sa Cross Pointe.

 Human miposte’g 17 puntos nga bentaha sa halftime, 28-11, ang NISSI  wala mokompiyansa sa nahabiling mga kuwarter aron maangkon ang 22 puntos nga kadaugan. (BANAT NEWS)

PUNTOS MATAG USA

Unang duwa:

 CCF (55) - A. Alocillo 12, K. Alocillo 10, Manding 8, Positos 5, Sumagang 4, Go 4, Hernando 3, Bulibuli 3, C. Alocillo 3, Pangilinan 2, Paredes 1.

 ACES (40) - Ceniza 10, Chan 6, Arevalo 6, Tangarorang 4, Subang 3, Villarin 3, Ruiz 3, Quintana 2, Sacabon 1, Llacuna 1, Dugenio 1.

Ikaduhang duwa:

 NISSI (53) - Oyao 9, Coutright 7, Eria 6, Molivva 6, Congreso 4, Villanueva 4, Avis 4, Junio 4, Labor 3, Regidor 2, Ortego 2, Noya 2.

 Cross Pointe (31) - Olojan 9, Trazo 5, Barton 4, Bacho 4, Napoles 3, Melancolico 3, Bacho 2, Legaspi 1.