RP Team-Gilas Pilipinas abante sa FIBA World Cup

Bisan unsaon nako'g kwenta sa oras, dili gyud mahimong huwaton nako ang resulta sa finals tali sa atong RP Team nga Smart Gilas Pilipinas aron unta atong mahibaw-an kung kinsay kampiyon sa bag-o lang natapos nga 11 ka adlaw nga 27th FIBA-Asia Championship sugod Agosto 1 hangtod Agosto 11 didto sa Mall of Asia Arena.

Kini tungod kay dia kita'y gituman o gisunod nga "deadline" sa atong pamantalaan ug bisan unsa kadako sa atong gusto nga ihatud nako ang resulta ngadto sa mga suki sa Banat, dili gyud mahimo.

Sayod na tingali kitang tanan nga miabante ang Gilas Pilipinas sa finals sulod sa dugay nang panahon human gipilde sa atong mga basketball heroes ang South Korea sa iskor, 86-79 nga maoy labing unang higayon sukad sa 1985 nga atong napilde pag-usab ang mga Koreano.

Kaniadto hinoon sa panahon pa nilang Mon Fernandez ilang napilde ang South Korea nga gipangulohan ni Shin Dong Pa atol sa 1973 Asian Basketball Confederation kung ABC, ang karaang ngalan sa FIBA-Asia.

Malisod nga tahas ang pagpukan sa Iran apan dili imposible.

Atong gisunod ang tanang duwa sa FIBA Asia gikan sa unang adlaw ug hangtod karon ning pagsuwat, bugtong Iran lang ang team nga walay pilde. Ingon ana sila kalig-on karon ilabi na gyud kay aduna sila'y maayong laking sentro nga si Hamed Haddadi nga nakaduwa na'g NBA.

 Gitapos sa Gilas ang first round sa ikaduhang pwesto sa 2-1 nga baraha ug bugtong Chinese-Taipei lang ang nakapilde kanato.

Lisod tuohan nga sa pagpanglabay sa pipila ka katuigan, mahimo nang usa ka basketball superpower ang Chinese-Taipei kinsa mipalagpot sa China pinaagi sa ilang 96-78 nga kadaugan.

Kaniadto dihang kanunay maoy hawud sa natad sa basketball ang Pilipinas, igo pa lang maantigo mo-dribble ang Chinese-Taipei ug ang uban natong silingan nasud sa Asia apan karon maglisod na kita'g pildi kanila tungod kay nag-umento na ang matang sa basketball nga ilang gitun-an.

Gawas pa niana, mogasto sab sila pagpadala ngadto sa ilang nasud og mga maayong coaches ug mga trainers aron pagpalambo sa ilang basketball.

Dinhi sa Southeast Asia hinoon, dili malalis nga ang Pilipinas maoy labing maayo kung itandi sa Thailand, Indonesia, Singapore, Malaysia, Vietnam ug Brunei.

Sa second round sa FIBA Asia, misamot kaanindot ang kumpetisyon ug tungod sa kadaugan sa Qatar batok sa Chinese-Taipei, nausab ang dagan sa torneyo ug kita maoy nahimong number one seed atol sa quarterfinal crossover sa atong 4-1 nga baraha.

Busa kung aduna man kita'y pasalamatan, dili nato unahon pagpasalamat ang mga Pilipino kay natural isip Pinoy, adto kita laban sa atong mga kababayan.

Apan sultihi kuno ako ninyo kung napilde pa ang Qatar unsa man kahay' atong gidangatan karong panahona?

Maayo na lang gani kay kita maoy nakakuha'g labing taas nga quotient human sa triple tie ug nakalikay kita sa China. Labing laktud pagkasulit, dili lang pulos abilidad ang atong gipakita sa maong torneyo apan ato sang angkonon nga miduyog kanato ang panahon ilabi na kay kita maoy host country.

Midaug ang Qatar batok sa Chinese-Taipei, 71-68 ug midaug ang Gilas batok Hongkong, 67-55 aron makamugna og triple tie.

Atol sa computation sa ilang mga scores, migawas nga ang Gilas adunay labing taas nga quotient sa ilang +5, ang Chinese-Taipei +2 ug ang Qatar -7.

MISCELLANEOUS. Belated birthday greetings to Gaw Dione Edera of the Customs Intelligence and Investigation Service (CIIS) who turned another milestone last August 9.  His birthday also coincided with the inauguration of his 11-bedroom boarding house-apartelle located at 2nd street, Fatima, Cebu City. It was an occasion that I also met my cousins that included Gwen Edera, Moning Roa, Ricky Roa and Bernie dela Rosa.