Labad ang boyfriend!

Dear Tito Miguel,

Ako diay si Ria, taga Consolacion, Cebu. Ang akong boyfriend nga si Earl kay labad kaayo. Permi na lang mangita og bikil. Gusto niya nga sa iya ra gyud nagtuyok ang akong kalibotan. Sa higayon nga molaag ko  kauban ang akong barkada, ganahan pud siya mokuyog . Ulaw kaayo, kay dapat baya, exclusive ra gyud sa barkada ang manglaag. Kun ako man siya pakuyogon, useless kaayo, kay naa magpakilid raman siya permi. In short, kill joy kaayo. Unsa akong buhaton? —RIA

Ria,

Nakakaplag ka’g uyab nga possessive ug seloso. Puwede ra unta kun ganahan ka sa pagbati nga gipanag-iya niya. Apan kay nagkisi-kisi man ka, buot pasabot dili mo compatible. Pasabta nga dili lang ka uyab niya, higala sab ka sa imong mga barkada, igsuon ug anak sa imong pamilya. Busa kinahanglan hatagan ka niya’g higayon mokuyog nila nga wala siya. Ipasalig kaniya nga imo siya hataga’g susama nga kagawasan nga mokuyog sa uban. Kun dili siya mosugot biyaan, pakuyoga sa usa ka kundisyon, nga dili magpakilid nga mura’g bata nga wa na ganahi ug mahimutang sa lakaw sa mga hamtong. Way buot, bastos pa gyud.

Kun mokuyog apan magpatagad gihapon, kinahanglan na ka magduha-duha, kun magpadayon ba ka sa relasyon nga ang imong pares bagahe, dili kaabag, konsumisyon ray ikahatag. Siya ang matang nga dili motagad sa imong mga higala hasta pamilya kay iyang tan-aw nila kumpetensiya.

Kun imo biyaan, posible mangamuyo ug mopasalig magbag-o. Ayaw dayo’g tuo, lagmit magpabugnaw ra na samtang higot pa ka. Paglabay sa panahon, iyang batasan mobalik gihapon.

Kay mao na iya’g pagkatawo, sama ra nga ang uban dili strikto, wala’y pakialam. Kay dili man ka kumportable, gusto man ka nga gawasnon mokuyog sa uban, dili ikaw ang babaye para niya. Lingkawas na, samtang sayo pa. Kana iyang style sa primero kiligon ka, apan ining kadugay matuok na ka. Kay dili sa tanang higayon magtinutokay mo sa mata, unsa na lang ang panginabuhi ninyo duha? Tito Miguel

Magpatambag ka? Ipada kang Tito Miguel: 0998-581-5856