Tenorio inspirasyon ng GSM sa pagsagupa sa SMB
MANILA, Philippines — Inaasahang magiging inspirado ang Barangay Ginebra sa kanilang misyon na maidepensa ang suot na korona.
Nasa isip si veteran guard LA Tenorio, lalabanan ng Gin Kings ang sister team na San Miguel Beermen ngayong alas-3 ng hapon sa Game One ng 2023 PBA Governors’ Cup best-of-five semifinals series sa Ynares Center sa Antipolo City.
Sa ikalawang laro sa alas-5:45 ng hapon ay bubuksan din ng mag-utol na TNT Tropang Giga at Meralco Bolts ang kanilang semis duel.
Kamakailan ay ibinunyag ni Tenorio na lumalaban siya sa kanyang stage three colon cancer at umaasang muling makakabalik sa hardcourt.
Hindi man naglalaro si six-time PBA MVP June Mar Fajardo ay isa pa ring malakas na koponan ang San Miguel sa likod nina import Cameron Clark, CJ Perez, Marcio Lassiter, Mo Tautuaa at Vic Manuel, ayon kay Ginebra coach Tim Cone.
“They have a lot of weapons out there,” sabi ng two-time PBA Grand Slam champion na si Cone. “You just have to figure out how to contain someone, especially the import (Clark) and CJ (Perez). They’ve all contributed, and they are moving the ball much better than they have in the past.”
Sina resident import Justin Brownlee, reinging PBA MVP Scottie Thompson, Christian Standhardinger, Jamie Malonzo at Jeremiah Gray naman ang problema ng Beermen.
“Nothing comes easy now. It’s the playoffs,” wika ni San Miguel coach Jorge Gallent sa pagtapat nila sa Ginebra. “I’m expecting we’re gonna have a hard time in the semifinals.”
Tinalo na ni Brownlee si Clark sa una nilang paghaharap matapos sibakin ng Gin Kings ang NLEX Road Warriors, 3-1, papasok sa championship series ng torneo noong nakaraang taon.
Pinatalsik ng No. 3 Ginebra ang No. 6 NLEX, 127-93, habang sinibak ng No. 2 San Miguel ang No. 7 Converge, 121-105 sa kani-kanilang quarterfinals matches.
Sa ikalawang laro, mag-uunahan din ang TNT at Meralco sa pagtatayo ng 1-0 bentahe sa kanilang semis showdown.
Pinasibat ng No. 1 Tropang Giga ang No. 8 Phoenix Fuel Masters, 132-105,, samantalang itinakas ng No. 4 Bolts ang 113-107 overtime win laban sa No. 5 Magnolia Hotshots sa quarters para itakda ang kanilang semis wars.
- Latest