Asian Persuasion

CEBU, Philippines — Nahuman na ang shooting ni KC Concepcion sa international movie nga Asian Persuasion, diin katrabaho niya ang mga Asian stars nga naila na sa Hollywood. Pares niya ang Fil-Am actor nga si Dante Basco. Kabahin ang pelikula sa usa ka chef nga bag-o lang nakig divorce, ug aron dili siya makabayad og alimony ug makahatag og child support, nangita siya og maminyuan sa iyang kanhi asawa. Apan naunay siya sa iyang plano kay nakaamgo siya nga love pa gihapon niya ang iyang asawa ug ganahan siya nga magkabalik sila. Didto sa New York gipahigayon ang shooting sa maong romcom movie.

Wala magdahom!

Dili pa makatuo si kanhi PBB teen housemate Nina Jose nga mayor na siya. Siya maoy gitakdang muhulip sa iyang bana isip mayor sa Bayambang, Pangasinan. Matud ni Nina sa usa ka facebook post, wala gyud niya damha nga mahitabo kini sa iyang kinabuhi. Ang kagustuhan gyud niya kaniadto mao ang mamahimong UN ambassador susama sa iyang idolo nga si Audrey Hepburn. Apan niya pa, hayan buot ang Ginoo nga dinhi niining paagiha siya mas makaserbisyo. Bana niya si mayor Cesar Quiambao kinsa tag-iya sa tech company nga mao ang Stradcom. Naminyo sila niadtong 2017, una agi'g civil wedding ug ikaduha sa simbahan na. Usa si Nina sa mga runner-up ni Kim Chui sa labing unang PBB teen edition.

"ANNEdito na siya"

Gi-promote na sa ABS-CBN ang nagsingabot nga pagbalik ni Anne Curtis sa noontime show It's Showtime. Kahinumduman nga nibiya si Anne sa maong show sanglit gihimugso niya ang iyang anak nga si Dahlia didto sa Australia ug nihukom siya nga hatagan kini og tukmang atensyon. Dihang nag-tuig na ang bata, nahukman ni Anne nga dili lamang una motrabaho sanglit aduna pay pandemya ug risgo kini alang sa iyang anak. Naabtan sab siya'g tuig didto sa Australia gumikan usab sa pandemya diin kuti ang pagbyahe byahe kaniadto.

Natrauma diay!

Giangkon ni Brenda Mage nga natrauma siya gumikan sa bashing nga iyang nadawat paggawas na niya sa Pinoy Big Brother house. Siya ug si Madam Inutz ang gikapungtan sa netizens atol sa celebrity efition gumikan sa ilang pagka marites samtang didto pa sila sa bahay ni Kuya. Matud ni Brenda, ang labihan nga bashing nga iyang nadawat ang matuod nga rason nganong nipauli una siya sa Cagayan ug nagpahilayo sa probinsya. Didto niya pa, iyang gitimbangtimbang ang mga panghitabo ug aminado siya nga nasayop gyud siya. Apan iya sab nga natugkad ang mga benepisyo sa iyang pagkalakip sa PBB. Usa si Brenda, kauban si Madam Inutz, sa gipabalik sa PBB adtong Domingo, isip wildcard housemates niining naghinapos na nga reality show.

Walay pagtugot

Aminado ang award-winning composer nga si Jonathan Manalo nga may mga kanta siya nga gigamit sa kampanya sa nilabay nga eleksyon. Gihimo matud pa nga campaign jingle sa mga politiko sa probinsya. Ang maong mga kanta mao ang Kadenang Ginto ug Pinoy Ako. Ilegal ang pagka gamit niini sanglit wala kini pagtugot niya o sa recording company. Makagukod gyud unta siya kun buot hunahunaon, apan kuti na matud pa ug dili siya ganahan og samok.

Mahirap maging fit!

Kana maoy deklarasyon sa 23-anyos nga si Sofia Andres ngadto sa PEP atol sa presscon alang sa iyang beauty product endorsement, ang Sooper Beaute.

Giangkon ni Sofia nga mas lisud na karon ang pagmaintain og sexy nga lawas itandi niadtong teenager pa lamang siya.

Gawas sa iyang cardio exercise nga swimming ug tennis game, nag-juicing sab siya.

 "Every time na I go to the beach, before that I try to work out and do juicing.

"So I drink mga juice lang for two days, the whole day. And then yun, it really helps."

Sa iyang Instagram, makita pud nga painting ang nahimo niyang bonding kauban ang iyang cutie nga anak nga si Zoe.

Padayag ni Sofia: During the pandemic, I just paint and paint and I think yun yung breakthrough ko because I was able to sell.

"I was able to sell and express myself through painting, and all that."

Matud niya, bisa'g unsa lamang ang iyang mahunahunaon nga i-paint. Kun dili siya ma-inspire, wala sab gyuy mogawas nga konsepto.

Sa duha ka tuig nga pandemic, 12 kabuok ang nahimong painting ni Sofia. Siyam niini ang nahalin.

Giangkon niya ngadto sa PEP nga hayan mag-exhibit siya sunod tuig. Magpractice usa siya og maayo.