Susiha og maayo

Dear Tito Miguel ,

Ako si Jarina, manager sa usa ka restaurant dinhi sa IT Park. Nagparamdam man akong ex-boyfriend nga si Niño uy! Sa tinuod lang, mahadlok ko if magbalik mi kay basin binuangan napud ko niya. Yes, dunay third party sa among break up two years ago. Nagbasol na daw siya sa iyang gibuhat maong nag-sorry siya og maayo nako. Ako ba siyang dawaton og balik? Unsay timailhan nga tinud-anay gyud ang iyang pagbasol?-- Jarina

Jarina,

Kun nagkarelasyon sila sa third party, susiha unsa’y nahitabo kanila. Dugay na ba sila nagbuwag unya karon kanimo mobalik? Tingali sa paglabay sa panahon nakaamgo siya, ikaw gyud iya’ng gihigugma. Apan delikado kini, nag trial and error siya sa inyo’ng relasyon, labi na sa imo’ng emosyon. Kun bag-o pa lang sila nagbuwag, nagbaga kini nga red flag, buot pasabot mora siya’g bata nga nangita’g moatiman kaniya. Selfish ug wala’y buot. Gibiyaan ba siya o siya ang nibiya. Kun siya ang gibiyaan, karon kanimo nidagan, buot pasabot nangita lang siya’g babaye nga kanunay naa sa iya’ng kiliran, maski dili niya hingpit nga gimahal. Selfish gihapon.

Kun siya ang nibiya, unsa ang rason. Kun siya nakaamgo ikaw gyud iya’ng gusto ug nangayo’g pasaylo, posible tinuod nga siya naghinulsol na. Apan wala’y garantiya ang tanan. Ang relasyon sugal, mahisugamak ka o masuwertehan. Gani, dagha’y dugay na nga minyo apan sa kataposan nasagmuyo. Wala’y timailhan nga makatag-an, panahon ra’y makatug-an. Apan kun gihigugma pa ninyo ang usa’g-usa, mahimo ninyo hataga’g lai’ng higayon inyo’ng relasyon. Apan ayaw ihatag ang tanan, ka’y sa una duna na siya’y binuhatan. Apan ayaw sige’g duda, mao na’y mohikaw sa imong kalipay. Ayaw sige’g guwardiya, kun tiunay iyang gugma, wala siya’y buhaton nga makapasakit kanimo. Karon kun mahitabo gyud imo’ng gikahadlokan, natubag na imo’ng pangutana. Buot pasabot niabot na mo sa utlanan. Di na ka molingi’g mangutana, unsa kaha kun imo siya gihataga’g second chance.   —Tito Miguel

Magpatambag ka? Ipada kang Tito Miguel: 0998-581-5856