EJ suportado ng POC sa mga international tourney

MANILA, Philippines — Muling iginiit ng Philippine Olympic Committee (POC) kay national pole vaulter Ernest John Obiena na makakasali siya sa mga international competitions kahit walang basbas ang Philippine Athletics Track and Field Association (PATAFA).

Ito ang tiniyak kahapon ni POC president Abraham ‘Bambol’ Tolentino kay O­biena na tinanggihan ang alok na mediation ng Philippine Sports Commission (PSC) na reresolba sana sa iringan nila ni PATAFA chief Philip Ella Juico.

“There’s a provision in the IOC charter, nakalagay doon na the NOC is the sole authority which submits the delegation proposed by the NSA, whether NSA or what, as the final list on all Olympic, regional, continental, and all world tournaments patronized by the IOC not only on sports merits but based on if the athlete will be an inspiration of the youth,” ani Tolentino sa online session ng Philippine Sportswriters Association (PSA) Forum.

Para makalahok ang isang atleta sa mga torneo ay kailangan niya ng endorsement ng kanyang National Sports Association (NSA).

Dahil sa kanyang pagtangging sumailalim sa mediation ay inaasahang itutuloy ng PATAFA ang pagsibak kay Obiena, ang Southeast Asian Games at Asian championship record-holder, sa national pool.

“Ang tanong dito sa NSA, if that athlete really has the potential, will we not endorse it just because of this brouhaha,” sabi ni Tolentino. “We will deprive the athlete of whatever medal.”

Hindi kasama ang pangalan ni Obiena sa inaprubahang 584 delegasyong isasalang ng POC sa 31st SEA Games sa Hanoi, Vietnam sa Mayo, ngunit kabilang siya sa 80 atletang nasa appeal list.